रायगड - पेण तालुक्यातील हेटवणे धरणातून वाशीसह नवी मुंबईला पिण्याच्या पाण्याचा पुरवठा करण्यात येतो. या हेटवणे धरणाचे 6 दरवाजे 2 फुटांनी शुक्रवारी सकाळी 9.30 च्या दरम्यान उघडण्यात आले आहेत. धरणाचे दरवाजे उघडले असले तरी धरण काठच्या तसेच नदीकिनारी असलेल्या गावांना कोणताही धोका नसला तरी सतर्क राहण्याचा इशारा पेण प्रशासनाकडून देण्यात आलेला आहे.
जिल्ह्यात आठवड्यापासून सतत होणाऱ्या पावसामुळे पेण तालुक्यातील हेटवणे धरण 90 टक्के भरले आहे. हवामान खात्याने दिलेल्या इशाऱ्यानुसार आगामी 4 दिवस अतिवृष्टी होणार असल्याने दक्षता बाळगत हेटवणे धरणाचे 6 दरवाजे 2 फुटांनी उघडले आहेत. हेटवणे धरणाची पाणी साठवण्याची क्षमता 146 दशलक्ष घनमीटर आहे. या धरणाला 6 दरवाजे असून या दरवाजाची उंची 3 मीटर आहे. सदरचे दरवाजे तूर्त 2 फुटांनी उघडले आहेत. या पाण्याचा विसर्ग प्रतिसेकंद प्रति सेकंद 50 हजार लिटर प्रमाणे प्रती तास 18 कोटी लिटर प्रमाणे होत आहे. त्यामुळे भोगावती नदी किनाराबव खाडीकिनार्यावरील ग्रामस्थांनी काळजी घेण्याचे आवाहन प्रांत अधिकारी प्रतिमा पुदलवाड यांनी केले आहे.