पनवेल- मागील दोन दिवसांपासून मुसळधार पावसाने पनवेल शहराला झोडपून काढले आहे. येथील अनेक सखल भागात पाणी साचल्याने पूरस्थिती निर्माण झाली आहे. त्यामुळे जनजीवन पूर्णपणे विस्कळीत झाली आहे. नवीन पनवेलमध्ये अनेक घरांमध्ये पाणी शिरल्याने अनेकांची तारांबळ उडाली आहे.
पनवेलमध्ये घरांमध्ये शिरले पाणी
सुकापूरजवळील गाढी नदीचे पंप कुचकामी असल्यामुळे नवीन पनवेलमधील अभ्युदय बँकसमोरील रस्ता, बांठिया शाळा ते कालिमाता मंदिर रस्ता पाण्याने पूर्णपणे ठप्प झाला आहे. पनवेल शहर, नवीन पनवेल, कळंबोली, खांदेश्वर, कामोठे परिसरामध्ये पाणी साचले होते. अनेक ठिकाणी वृक्ष उन्मळून पडल्याच्या घटना घडल्या. सिडकोने नालेसफाई व्यवस्थित न केल्याने ही परिस्थिती उद्भवली आहे, अशी संतप्त प्रतिक्रिया येथील रहिवाशांनी दिली आहे. तर याबाबत प्रतिबंधात्मक उपाययोजना कराव्यात, अशी मागणी जोर धरू लागली आहे.