पुराच्या पाण्यातून २ महिन्यांच्या बाळाला वाचवले सुखरुप; पेणमधील अंतोरे गावची घटना

रायगड जिल्ह्यात पेणमध्ये पावसाने उच्चांक गाठल्याने पूर्ण तालुका जलमय झाला आहे. पेणमध्ये रात्री पुराच्या पाण्यात अंतोरे गावातील,दोन महिन्यांच्या बाळासह 30 ते 40 जण अडकले होते. बचाव पथकाने दोन महिन्यांच्या बाळाला व त्याच्या आईला पुराच्या पाण्यातून काढून सुरक्षित स्थळी पोहचवले आहे.

रायगड - जिल्ह्यात पेण तालुक्यात 493 मिमी एवढा विक्रमी पाऊस पडला आहे. परिणामी तालुक्यात पूरसदृश स्थिती निर्माण झाली आहे. पेणमध्ये रात्री पुराच्या पाण्यात अंतोरे गावातील 30 ते 40 जण अडकले होते. यामध्ये एक दोन महिन्यांचे बाळही आपल्या आई-वडिलांसोबत अडकले होते. या कुटुंबासह बाळाला बचाव पथकाने रात्री सुखरुप सुरक्षितस्थळी पोहचवले आहे.

जिल्ह्यात पेणमध्ये पावसाने उच्चांक गाठल्याने पूर्ण तालुका जलमय झाला. पेणमधील नद्याही धोक्याची पातळी ओलांडून वाहत आहेत. रात्रीच्या सुमारास अंतोरे गावात पाणी भरण्यास सुरुवात झाली. पाणी हळूहळू ग्रामस्थांच्या घरात घुसू लागल्याने सर्वजण भयभीत झाले होते. अंतोरेमध्ये पुराचे पाणी घुसल्याची माहिती मिळताच पेण प्रशासनाने कोलाड येथील महेश पवार यांच्या बचाव पथकाला बोलावले. त्यानंतर महेश पवार यांच्या 'कुंडलिका रिव्हर राफ्टिंग टीम'ने बोटीच्या सहाय्याने अंतोरे मधील अडकलेल्या कुटूंबांना हलवण्यास सुरुवात केली. मुसळधार पाऊस पडत असतानाही हे बचावकार्य सुरू होते. बचाव पथकाने दोन महिन्यांच्या बाळाला व त्याच्या आईला पुराच्या पाण्यातून काढून सुरक्षित स्थळी पोहचवले.