हिंदू असूनही गेल्या 21 वर्षापासून राजू घूमकर करतायेत रोजाचे उपवास

आलिबाग शहरातील रामनाथ परिसरात राहणारे राजू घूमकर हे गेल्या 21 वर्षापासून रोजाचे उपवास करीत आहेत. मुस्लीम धर्मियांचा रोजा करीत असले तरी त्यांनी हा धर्म स्वीकारलेला नाही.

रायगड - रमजान हा मुस्लीम धर्मियांचा पवित्र महिना मानला जातो. मुस्लीम बांधव या महिन्यात रोजा पाळतात. हा रोजा लहान मुलापासून मोठ्यापर्यंत पाळतात. मात्र, आलिबाग शहरातील रामनाथ परिसरात राहणारे राजू घूमकर हे गेल्या 21 वर्षापासून रोजाचे उपवास करीत आहेत. मुस्लीम धर्मियांचा रोजा करीत असले तरी त्यांनी हा धर्म स्वीकारलेला नाही. मात्र, त्यातून त्यांना एक आत्मिक सुख मिळत असल्याची भावना राजू घूमकर यांनी व्यक्त केली आहे.

अलिबाग शहरातील रामनाथ परिसरात राहणारे राजू घुमकर हे भंडारी समाजाचे असून, उत्तम बिर्याणीकार आहेत. राजू घूमकर हे नागाव येथे गारमेंट कंपनीत कँटिन इंचार्ज म्हणून काम करीत होते. याठिकाणी यूपी, बिहार, आंध्र प्रदेश राज्यतील अडीचशे, तीनशे मुस्लीम बांधव काम करीत होते. रमजान महिन्यात हे सर्व मुस्लीम बांधव रोजाचा उपवास करीत असे. त्यावेळी पुरीभाजी देण्याचे काम घुमकर करीत होते. मात्र, आंध्र प्रदेशमधील बांधवांना पुरीभाजी नको असल्याने घुमकर यांनी फोडणीचा भात करून दिला. त्यामुळे आंध्र प्रदेशमधील मुस्लीम बांधव हे खुश झाले. त्यावेळी घुमकर यांनी आपण रोजा पकडता आणि खण्यापिण्यावरून तंटे करता याबाबत विचारणा केली. त्यावेळी रोजाचे उपवास करणे हे कठीण असते, असे मुस्लीम बांधवानी सांगितले. त्यानंतर राजू घुमकर यांनीही मी रोजा पकडतो असे बोलले. त्यावेळी हा काय रोजा पकडणार अशी चेष्टाही केली. मात्र, घुमकर यांनी मनाशी गाठ बांधून मधुमेह आजार असतानाही रोजाचे उपवास सुरू केला. आज 21 वर्ष ते नित्यनियमाने रमजान महिन्यात रोजा पकडत आहेत.

मुस्लीम बांधवांचा रोजा पकडला म्हणून घरच्या लोकांनी आक्षेप घेतला नाही. मात्र, मित्रमंडळींनी त्याची चेष्टा केली. मात्र, या चेष्टेकडे दुर्लक्ष करून आजही घुमकर हे रोजाचे उपवास पूर्ण करीत आहेत. रोजाचे सर्व नियम पाळून ते रोजा करीत आहेत. त्यातून त्यांना एक आत्मिक सुखही मिळत असल्याचे घुमकर यांनी सांगितले. धर्म कुठलाही असला तरी इच्छा शक्ती असली तर घुमकरसारखे लोक घेतलेले व्रत आजही पूर्ण करीत आहेत. तसेच हिंदू धर्मियात असलेले सणही तेवढ्याच श्रद्धेने ते साजरे करत आहेत.