Pen Urban Bank Scam : पेण अर्बन बॅंक 750 कोटी घोटाळ्याची 12 वर्षे होऊनही चौकशी सुरू; अजूनही बोगस कर्जदार मोकाट

पेण कृषी उत्तन्न बाजार समितीच्या पेण अर्बन बॅंकेचा घोटाळा जगजाहीर आहे. बारा वर्षे होऊन ही अजूनही याची शहानिशा झाली नसल्याने बोगस कर्जदार मोकाटच फिरत आहे. या घोळ्यात एकूण 611 कोटी 15 लाख रुपयांची वसुली येणे बाकी आहे. असे असताना आता या ठिकाणी पहिल्यांदाच निवडणुका लागल्या आहेत.

पेण :पेण तालुक्यात 3 सप्टेंबर 1935 साली स्थापना झालेल्या पेण अर्बन बँकेचा सन 23 सप्टेंबर 2010 साली 795 कोटी 86 लाख रुपयांचा घोटाळा झाल्याचे स्पष्ट झाल्यानंतर बँकिंग रेग्युलेशन अॅक्ट 1949 चे कलम 35 अ अन्वये अर्थिक निर्बंध लागू झाले होते. त्यानंतर 24 सप्टेंबर 2010 रोजी तातडीने पेण अर्बन बँकेवर प्रशासक मंडळाची नियुक्ती करण्यात आली होती. मात्र, या बँकेच्या भ्रष्टाचाराच्या घटनेनंतर आजपर्यंत 13 वर्षे झाली. पण, बँक सुरू झाली नाहीच, शिवाय बँकेच्या खातेदारांना व ठेवीदारांना त्यांची भरलेली मुद्दलही मिळाली नाही.

बोगस कर्जदारांना पैसे वाटप :बंँकेच्या कागदोपत्री 795 कोटी 86 लाख रुपयांचे कर्ज देण्यात आले आहे, असे दाखविण्यात आले आहे. प्रत्यक्षात मात्र 49 कोटी 96 लाख रुपयांचे कागदोपत्री कर्जदार असून, बोगस कर्जदार ज्यांचे कोणतेही कागदपत्र नाही, असे 745 कोटी 90 लाख रुपयांचे खोट्या कर्जदारांच्या नावे कर्ज वाटप झाले आहे. तर पेण अर्बन बँकेची कर्ज वसुली मोहीम अतिशय संथगतीने सुरू असून, यापैकी पेण अर्बन बँकेकडून आजतागायत 184 कोटी 71 लाखांचीच वसुली झाली आहे. तर 611 कोटी 15 लाख रुपये वसुली होणे बाकी आहे. शिवाय 01 एप्रिल 2022 ते 28 फेब्रुवारी 2023 अखेर पेण अर्बन बँकेने कर्जदारांना एकरकमी परतफेड योजनेंंतर्गत प्राप्त झालेल्या 227 अर्जातून 2 कोटी 74 लाख रुपयांची वसुली केली आहे.

आतापर्यंत मिळालेले कर्ज :बँकेतील ठेवीदारांपेैकी उच्च न्यायालयाच्या 20 ऑगस्ट 2015 च्या आदेशानुसार आजपर्यंत 10 हजार रुपयांपर्यंत रक्कम असणाऱ्या सर्व शाखांमधून 13 हजार 723 ठेवीदारांना 4 कोटी 95 लाख 8 हजार 211 रुपये, तर 25 हजार रुपयांपर्यंतच्या 9 हजार 632 ठेवीदरांना 12 कोटी 16 लाख 80 हजार 360 रुपयांपर्यत रकमा परत मिळाल्या आहेत.

पेण अर्बन बँक प्रश्न अजूनही सुटला नाही :75 वर्षांची परंपरा असलेल्या अर्बन बँक घोटाळ्याला एक तप होऊन गेले आहे. पेण अर्बन बँक 2010 ला बुडीत निघाली आणि रायगडसह मुंबईत हाहाकार माजला. सहकार क्षेत्राला मोठा हादरा बसला होता. ठेवीदार व खातेदार आपले पैसे कधी मिळतील या आशेवर अजूनही आहेत. मागील निवडणुकीच्या प्रचाराला देवेंद्र फडणवीस यांनी अर्बन बँक प्रश्न सोडविण्यासाठी प्रयत्न केला जाईल, असे आश्वासन दिले होते. त्यानंतर देवेंद्र फडणवीस मुख्यमंत्री, विरोधी पक्षनेते व आता उपमुख्यमंत्रीसुद्धा आहेत. परंतु, पेण अर्बन बँक प्रश्न अजूनही सुटला नाही. बँकेचा प्रश्न निकाली निघत आमचे हक्काचे पैसे कधी मिळणार, अशी मागणी ठेवीदार खातेदार करीत आहेत.

पेण कृषी उत्तन्न बाजार समितीची पहिल्यांदा निवडणूक : आता कृषी उत्पन्न बाजार समितीची निवडणूक लागली आहे. पेण तालुका कृषी उत्पन्न बाजार समितीच्या एकूण 18 जागांसाठी होणाऱ्या निवडणुकीकरिता आज शेवटच्या दिवशी एकूण 54 अर्ज दाखल झाले आहेत. पहिल्यांदाच या निवडणुकीत चुरस होणार आहे. परंतु, 2010 साली झालेल्या मोठ्या घोटाळ्याची चौकशी बाकी आहे.

हेही वाचा : Speed Boat Accident : संभाजीराजे आणि मंत्री उदय सामंत थोडक्यात बचावले, मांडवा जेट्टीवर आदळली स्पीडबोट