कोरोना नियमांचे पालन करत भक्तांकडून बल्लाळेश्वराचे दर्शन, मंदिर परिसरात उत्साहाचे वातावरण

तब्बल आठ महिन्यानंतर अष्टविनायकापैकी एक असलेल्या पाली बल्लाळेश्वराचे दर्शन आजपासून भक्तांना खुले झाले आहे. त्यामुळे आज गणेश भक्तांनी दर्शनासाठी मंदिरात धाव घेतली. पाली बल्लाळेश्वर मंदिर प्रशासनाने कोविडचे नियम पाळून भक्तांना दर्शनाची सुविधा उपलब्ध करून दिली आहे.

रायगड -मार्च महिन्यापासून कोरोना महामारीमुळे जिल्ह्यातील धार्मिक स्थळे बंद करण्यात आली होती. शासनाने दिवाळी पाडव्याच्या मुहूर्तावर राज्यतील मंदिरे खुले करण्यास परवानगी दिली आहे. आठ महिन्यानंतर अष्टविनायकापैकी एक असलेल्या पाली बल्लाळेश्वराचे दर्शन आजपासून खुले झाले आहे. त्यामुळे आज गणेश भक्तांनी दर्शनासाठी मंदिरात धाव घेतली. पाली बल्लाळेश्वर मंदिर प्रशासनाने कोविडचे नियम पाळून भक्तांना दर्शनाची सुविधा उपलब्ध करून दिली आहे.

धार्मिक स्थळे खुली केल्याने भक्तांमध्ये आनंद

22 मार्चपासून कोरोना प्रादुर्भाव वाढू लागल्यानंतर शासनाने गर्दीची ठिकाणे नागरिकांसाठी बंद केली. यामध्ये समुद्रकिनारे, ऐतिहासिक गड, किल्ले, धार्मिक स्थळे यावर जाण्यास पर्यटकांना आणि भाविकांना बंदी केली होती. हळूहळू शासनाने टाळेबंदी शिथिल केल्यानंतर व्यवहार सुरू झाले. समुद्रपर्यटन, गड किल्ले यावर जाण्यास शासनाने परवानगी दिली. मात्र शासन मंदिरे खुली करत नसल्याने आंदोलने करण्यात आली, मोर्चे काढण्यात आले. अखेर शासनाने दिवाळी पाडव्याच्या मुहूर्तावर सर्व मंदिरे खुली करण्यास परवानगी दिली आहे. आजपासून सर्व मंदिरे, मस्जिद, चर्च, गुरुद्वारा खुले झाल्याने भक्तांमध्ये आनंदाचे वातावरण आहे.

कोरोनाच्या नियमाचे पालन करून भाविकांना दर्शन

पाली येथील बल्लाळेश्वर मंदिर आजपासून भाविकांना दर्शनासाठी खुले करण्यात आले आहे. त्या आधी कोरोनाच्या पार्श्वभूमीवर मंदिर परिसर सॅनिटायझ करण्यात आला होता. दर्शनासाठी येणाऱ्या भाविकांना सॅनिटायझ करून, मास्क लावून दर्शनासाठी सोडले जात आहे. तसेच सुरक्षित अतंराच्या नियमांचे देखील पालन करण्यात येत आहे, बल्लाळेश्वराचे मंदिर भाविकांसाठी खुले झाले आहे. मात्र भाविकांना सभामंडपातूनच श्रीचे दर्शन घ्यावे लागत आहे. कोरोनाच्या पार्श्वभूमीवर अद्यापही गाभाऱ्यात जावून दर्शन घेण्याची परवानगी भाविकांना देण्यात आलेली नाही.

स्थानिक व्यवसायिकांमध्ये आनंद

आठ महिन्यांपासून मंदिर भाविकांना बंद असल्याने स्थानिक व्यावसायिकांना याचा चांगलाच आर्थिक फटका बसला आहे. मात्र आता मंदिरे सुरू झाल्याने भाविक पुन्हा एकदा मंदिरात यायला सुरू झाले आहे. त्यामुळे मंदिर परिसरात असलेल्या मिठाई, फुलं विक्रेते, व इतर व्यावसायिकांनी आनंद व्यक्त केला आहे.