रायगड -रेल्वे, विमान, कॅब या माध्यमांमध्ये प्रवासी वाहतूक सेवेबाबत आपले वाहन किती वाजता ईच्छित स्थळी पोहोचणार याची अद्ययावत माहिती प्रवाशांना मोबाईल अॅपद्वारे मिळते. मात्र, आता ग्रामीण भागातील जीवनवाहिनी असलेल्या एसटी बसमध्येही व्हिटीएस (व्हेईकल ट्रॅकिंग सिस्टम) आणि पीआयएस( पॅसेंजर इन्फॉर्मेशन सिस्टम) प्रणाली बसवण्याचा निर्णय घेण्यात आला आहे.
राज्य परिवहन महामंडळाच्या बस आता आणखी हायटेक
यामुळे बस नक्की कुठे आहे, किती वाजता येणार, त्यामधील चालक, वाहक आणि बसचा नंबर, ही सर्व माहिती प्रवाशांना एका क्लिकवर मिळणार आहे. एसटी बसही हायटेक होणार असल्याने प्रवाशांचा वेळ वाचणार आहे. अलिबाग आणि महाड आगारामध्ये या सुविधा प्रायोगिक तत्वावर सुरू झाल्या आहेत. इतर सहा आगारांमध्येही ही प्रणाली लवकरच सुरू करण्यात येणार आहे. त्यामुळे प्रवाशांना बससाठी ताटकळत बसण्याची गरज पडणार नाही.