महावितरणचे "एक गाव एक दिवस" अभियान गावासाठी फायदेशीर

'एक गाव एक दिवस' या अभियान अंतर्गत महावितरणच आता गावात येऊन समस्या सोडवू लागले आहेत. त्यामुळे रायगडकरांना आता महावितरण कार्यालयाचे उबरडे झिजवावे लागणार नसल्याचा सुखद धक्का बसला आहे.

रायगड - गाव पाड्यात विजेचा खांब, तुटलेल्या विजेच्या तारा, डीपी बदलायचा असेल किंवा विजेबाबत काही समस्या असतील तर ग्राहकाला आणि ग्रामस्थांना हजार चकरा महावितरण कार्यालयात माराव्या लागतात. मात्र कामे होत नाहीत. मात्र आता ही समस्या महावितरण विभागाने सोडवली आहे. महावितरण अधिकारी कर्मचारी हेच आता गावागावात येऊन समस्या सोडवू लागले आहेत. 'एक गाव एक दिवस' या अभियान अंतर्गत महावितरणच आता गावात येऊन समस्या सोडवू लागले आहेत. त्यामुळे रायगडकरांना आता महावितरण कार्यालयाचे उबरडे झिजवावे लागणार नसल्याचा सुखद धक्का बसला आहे.

एक गाव एक दिवस अभियान जिल्ह्यात सुरू

जिल्ह्यात एक गाव एक दिवस हे अभियान रायगड जिल्ह्यात सुरू करण्यात आले आहे. अलिबाग तालुक्यातील वाडगाव येथे हे अभियान राबविण्यात आले आहे. महावितरण आणि ग्राहक यांच्यात स्नेहाचे संबंध दृढ होऊन गावातील विजेच्या समस्या त्वरित सोडविण्यासाठी हे अभियान राज्यासह जिल्ह्यात सुरू करण्यात आले असल्याचे भांडुप परिमंडळचे मुख्य कार्यकारी अभियंता सुरेश गणेशकर यांनी ईटीव्ही भारतशी बोलताना सांगितले. रायगड अधीक्षक अभियंता दीपक पाटील, अलिबाग कार्यकारी अभियंता कुंदन भिसे, सहायक अभियंता मोतीराम रघ, सहायक अभियंता सादिक इनामदार, विकास जगताप, वाडगाव ग्रामपंचायत सरपंच सरिता भगत, उपसरपंच प्रसाद पाटील, सदस्य जयेंद्र भगत, ग्रामस्थ, महावितरण कर्मचारी अभियानात सहभागी झाले होते.

अभियानातून लाखोंची वसुली तर नादुरुस्त कामाचीही त्वरित होत आहे दुरुस्ती

अलिबाग तालुक्यातील वाडगावसह चिंचवली, आवास, नेहुली, कार्ले या गावात एक गाव एक दिवस हे अभियान राबविण्यात आले आहे. या गावातील विजेबाबतच्या त्वरित सुटणाऱ्या समस्या अधिकारी कर्मचारी यांनी सोडविल्या आहेत. तर इतर समस्या ह्या लवकरात लवकर सोडविल्या जाणार आहेत. वाडगाव येथे झालेल्या अभियानात गावातील जुने सहा पोल त्वरित बदलण्यात आले आहेत. सिंगल फेज वीज लाइन बदलून थ्री फेज लाइन टाकण्यात आली आहे. त्यामुळे या गावातील विजेचा प्रश्न सुटण्यास मदत झाली आहे. तसेच 200 केव्हीची नवीन डीपी ही जिल्हा नियोजन निधीमधून बसविण्यात येणार आहे. वाडगाव गावातून 1 लाखाहून अधिक थकीत वीज बिलाची वसुली करण्यात आली आहे. उर्वरित गावातूनही लाखोंची वसुली या अभियानातून केली गेली आहे.

33 टक्के निधी गावासाठी खर्च होणार

राज्य शासनाने शेतकऱ्यांसाठी कृषी पंप योजना 2020 लागू केली आहे. यामधून वसूल झालेल्या वीज बिलातील 33 टक्के निधी हा त्या गावातील महावितरण कामासाठी खर्च केला जाणार आहे. त्यामुळे गावातील महावितरणच्या विजेच्या दुरुस्तीचा खर्च आता वीज बिल वसूल झाल्यानंतर त्वरित उपलब्ध होणार असल्याने कामे खोळंबणार नाहीत. त्यामुळे एक गाव एक दिवस अभियान गावकऱ्यांसाठी फायदेशीर ठरत आहे.