पनवेल- पनवेल रेल्वे स्थानक म्हटले की गर्दी शिवाय दुसरे काही डोळ्यासमोर येत नाही. त्यात सायंकाळची वेळ म्हटलं की जो तो फक्त गाडी पकडण्याच्या नादातच असतो. अचानक गर्दीमधल्या एका नवख्या प्रवाशाने सर्वांचेच लक्ष वेधून घेतले आणि पनवेलकरांनी स्वतःची रोजची लोकल चुकवत काही काळ परिसरात घालवला. बघता बघता हा नवा प्रवासी सर्वांचा लाडका झाला. हा नवा प्रवासी दुसरा तिसरा कुणी नसून चक्क माकड होता.
माकडाने सर्वांचे लक्ष वेधून घेतले.
सायंकाळी ५ च्या सुमारास लोकल पकडायला आल्याप्रमाणे हे माकड फलाटावर अवतरले आणि मर्कटलीला दाखवायला सुरुवात केली. घाई-गडबडीत असलेल्या प्रवाशांनी लोकलच्या घडाळ्याकडे न पाहता या माकडाचे खेळ पाहणं पसंत केलं. या माकडाचे वेगवेगळे हावभाव आपल्या मोबाईलच्या कॅमेऱ्यात टिपण्यासाठी तेथील प्रवाशांमध्ये स्पर्धा लागली.