रायगड - आज 5 मे रोजी दारूची दुकाने उघडी होणार असल्याचे कळल्यावर तळीराम पहाटेपासूनच दुकानासमोर रांगा लावून उभे होते. दुकाने सुरू होताच आता दारू मिळणार, हा आनंद त्यांच्या चेहऱ्यावर ओसंडून वाहताना दिसत होता. दरम्यान, दुकाने सुरू झाल्यावर सोशल डिस्टन्सिंग पाळत मद्यविक्री केली जात आहे.
अखेर रायगडमध्ये मद्यविक्री सुरू, पहाटेपासूनच दुकानासमोर रांगा कोरोनाच्या पार्श्वभूमीवर लॉकडाऊन जाहीर केल्यानंतर दीड महिना उलटून गेला. या काळात मद्यविक्री बंद करण्यात आली होती. त्यामुळे मद्यपींच्या जीवाची घालमेल झाली होती. अनधिकृतपणे जिल्ह्यात मद्य विक्री सुरू असली तरी अव्वाच्या सव्वा पैसे देऊन तळीराम मद्य विकत घेत होते. त्यामुळे मद्याची दुकाने कधी सुरू होणार? याकडे तळीरामांचे लक्ष लागून राहिले होते. अखेर शासन आणि प्रशासनाने कोरोनाबाधीत क्षेत्र वगळून मद्याची दुकाने सुरू करण्याचा निर्णय घेतला आणि तळीरामांना खुश केले. जिल्ह्यात आज 5 मेपासून मद्यविक्री सुरू करण्याचा निर्णय जिल्हा प्रशासनाने घेतल्याने पहाटेपासून दुकानासमोर भल्या मोठ्या रांगा पाहायला मिळत होत्या. प्रत्येक व्यक्तींमध्ये सहा फुटांचे अंतर ठेवून सोशल डिस्टन्सिंगचे नियम पाळून मद्य विक्री सुरू केली. यावेळी मद्य खरेदी करणाऱ्या व्यक्तीला सॅनिटायझर लावूनच सोडत आहेत.
