महाड एमआयडीसी येथील कंपनीत वायू गळती; 7 कर्मचारी बाधित

महाड औद्योगिक वसाहती मधील इंडो अमाईन लिमिटेड या कंपनीत सायंकाळच्या सुमारास वायू गळती झाली. यामध्ये सात कामगारांना रासायनिक वायूची बाधा झाल्याने त्यांना महाड मधील खाजगी रुग्णालयात उपचारासाठी दाखल करण्यात आले.

रायगड - महाड औद्योगिक वसाहती मधील इंडो अमाईन लिमिटेड या कंपनीत सायंकाळच्या सुमारास वायू गळती झाली. यामध्ये सात कामगारांना रासायनिक वायूची बाधा झाल्याने त्यांना महाड मधील खाजगी रुग्णालयात उपचारासाठी दाखल करण्यात आले. वायू बाधा झाल्याने त्यांची प्रकृती चिंताजनक असल्याचे डॉ. देशमुख यांनी सांगितले.

उत्पादन विभागात वायू गळती

प्राथमिक माहितीनुसार, महाड औद्योगिक क्षेत्रात असलेल्या इंडो अमाईन या कारखान्यात सायंकाळी साडे पाच वाजण्याच्या सुमारास उत्पादन विभागात वायू गळती झाली. यामुळे या ठिकाणी काम करणारे सात कामगार जखमी झाले. जखमींना महाड मधील देशमुख नर्सिंग होम या खाजगी रुग्णालयात दाखल केले आहे. सदर कामगारांना हायड्रोजन सल्फाईड वायूची बाधा झाल्याचे कंपनी व्यवस्थापक जयप्रकाश शेट्टी यांनी सांगितले.

सात कर्मचाऱ्यांना वायू बाधा

कंपनीतील उत्तम किसन पवार, तेजस विजय चाळके, जयराम चंद्रकांत चौधरी, पंकजकुमार सोहम महेतो, राजनीशांत नायर, दत्तात्रय साहेबराव कोल्हे, पप्पू कमल महातो, अशी वायू बाधा झालेल्या कर्मचाऱ्यांची नावे आहेत. त्यांच्यावर उपचार करण्यासाठी डॉ. फैजल देशमुख यांनी हॉस्पिटलमध्ये अथक प्रयत्न केले. महाड औद्योगिक वसाहत पोलीस ठाण्याचे पोलीस निरीक्षक पंकज गिरी यांनी रुग्णालयात जाऊन घटनेची सविस्तर माहिती घेतली.

हेही वाचा -566 ग्रामपंचायत सरपंच पद आरक्षण जाहीर