पनवेलमध्ये गोणीत सापडला चिमुकल्याचा मृतदेह; परिसरात चिंतेचे वातावरण

कुंडेवहाळ गावात जेएनपीटी रोडच्या कडेला प्लास्टिकच्या गोणीत एका मुलाचा बेवारसपणे मृतदेह पडून असल्याचे दिसून आले. पोलीस पाटील दत्तात्रय पाटील यांनी घटनास्थळी जाऊन पाहणी केली असता पांढऱ्या प्लास्टिकच्या गोणीत एका लहान मुलाचा मृतदेह आढळून आला.

रायगड- पनवेलच्या कुंडेवहाळ गावात प्लास्टिकच्या गोणीत एका मुलाचा मृतदेह आढळला. ही घटना सकाळच्या सुमारास उघडकीस आली. पनवेलमध्ये सलग दुसऱ्यांदा अशी घटना घडली. या घटनेमुळे परिसरात खळबळ उडाली असून चिंतेचे वातावरण पसरले आहे.

कुंडेवहाळ गावात जेएनपीटी रोडच्या कडेला प्लास्टिकच्या गोणीत एका मुलाचा बेवारसपणे मृतदेह पडून असल्याचे दिसून आले. पोलीस पाटील दत्तात्रय पाटील यांनी घटनास्थळी जाऊन पाहणी केली असता पांढऱ्या प्लास्टिकच्या गोणीत एका लहान मुलाचा मृतदेह आढळून आला. त्यानंतर पाटील यांनी पनवेल शहर पोलिसांना याबाबत माहिती दिली. तेव्हा पोलिसांनी केलेल्या तपासणीमध्ये गोणीत ८ ते ९ वयोगटातील लहान मुलाचा मृतदेह आढळून आला. या लहान मुलाने हिरवा टी-शर्ट आणि काळी हाफ पॅन्ट घातलेली होती.

या लहानग्या चिमुकल्याची हत्या करून पुरावा नष्ट करण्यासाठी त्याचा मृतदेह पांढऱ्या प्लास्टिकच्या गोणीत घालून तो घटनास्थळावर टाकण्यात असल्याचा अंदाज व्यक्त केला जात आहे. काही दिवसांपूर्वीच पनवेलमधल्या गाढी नदीजवळ एका ३० ते ३५ वयोगटातील पुरुषाचा मृतदेह सापडला होता. या व्यक्तीची गळा आवळून हत्या केल्याचे नंतर तपासात उघड झाले होते. ही घटना ताजी असतानाच पनवेलमध्ये लहान मुलाचा मृतदेह आढळून आल्याने लोकांमध्ये चिंतेचे वातावरण पसरले आहे. पोलिसांनी मुलाचा मृतदेह ताब्यात घेऊन शवविच्छेदनासाठी पाठवला आहे. मुलाची ओळख अद्याप पटली नसून याप्रकरणी पोलिसांकडून अधिक तपास सुरू आहे.

हेही वाचा-पनवेलमध्ये प्रधानमंत्री आवास योजनेविरोधात कामोठेकरांचा मोर्चा