रायगड-महाड शहराला पुराच्या पाण्याने वेढले असून नागरिकांच्या घरात पाणी घुसले आहे. त्यामुळे नागरिकांचे हाल झालेले आहेत. तर दुसरीकडे सावित्री नदीत असलेल्या मगरीपैकी एक मगर ही पुराच्या पाण्यात शहरातील एका घराच्या छपरावर विसावली आहे. आठवड्यापूर्वी झालेल्या मुसळधार पावसाने दादली पुलावरही मगर दिसली होती. त्यामुळे नागरी वस्तीत मगरींचा वावर वाढल्याने महाडकरामध्ये भीतीचे वातावरण पसरले आहे.
घराच्या छपरावर येऊन विसावलेली मगर
महाड शहरात पाच दिवसापासून मुसळधार पाऊस, पूर अशी परिस्थिती निर्माण झाली आहे. तर पूर परिस्थिती नियंत्रणात येत असताना पुन्हा सावित्री नदीच्या पातळीत वाढ होत असल्याने पूरपरिस्थिती कायम राहत आहे. पुराच्या पाण्याचा फटका हा नागरिकांना बसत असताना सावित्री नदीत असणाऱ्या मगरीही आता बाहेर येण्यास सुरुवात झाली आहे.