पेण (रायगड) -पेण तालुक्यातील तांबडशेत गावात 75 वर्षीय आनंदीबाई मारुती पाटील यांची धारदार कोयत्याने गळा कापून हत्या करण्यात आली आहे. पैशाच्या वादातून ही हत्या झाल्याचा प्राथमिक अंदाज व्यक्त केला आहे. संशयित आरोपी दादर सागरी येथील पोलिसांनी ताब्यात घेतले आहेत.
सविस्तर माहिती अशी की, पेण तालुक्यातील तांबडशेत गावातील आनंदीबाई मारुती पाटील या 75 वर्षीय महिलेची धारदार शस्त्राने गळा कापून हत्या करण्यात आली. त्या बुधवारी (ता. 6) सायंकाळी 4 ते 6 या वेळेत गावाबाहेरील तलावाशेजारील आंब्याच्या बागेत जळाऊ लाकडे गोळा करण्यासाठी गेल्या होत्या. येथे अज्ञात व्यक्तीकडून धारदार कोयत्याने या महिलेची निर्घृण हत्या करण्यात आली. प्राथमिक अंदाजानुसार संशयित आरोपीला पोलिसांनी ताब्यात घेतले आहे. मयत महिलेला गहाण वस्तू सोडविण्यासाठी 2 वर्षांपूर्वी 25 हजार रुपये दिले होते. ते या महिलेने परत न दिल्याने ही हत्या झाल्याची चर्चा आहे.