बारामती (पुणे) -देशातील काही भागांत थंडीच्या काळात जलाशयाच्या ठिकाणी परदेशातून अनेक पक्षी येतात. इंदापूर येथील उजनी धरणाच्या पाणलोट क्षेत्रातही अनेक पक्षी येतात. गुलाबी थंडीची चाहूल लागताच उजनी जलाशयावर हजारो किलोमीटरचा प्रवास करून फ्लेमिंगोसह विविध प्रजातींच्या पक्ष्यांनी हजेरी लावण्यास सुरुवात केली आहे. त्यामुळे आता पर्यटकांची पावले उजनी पाणलोट क्षेत्राकडे वळू लागली आहेत.
नयनरम्य दृश्य
उजनी जलाशयाचा विस्तीर्ण परिसर त्यात नौका विहार विविध प्रजातींच्या लाखो पक्षांचा किलबिलाटासह जलाशयावर मुक्त संचार, मच्छीमारांच्या नवका, रुचकर मच्छी भोजन, सूर्योदय व सूर्यास्ताचे नयनरम्य दृश्य सध्या उजनी पाणलोट क्षेत्रात दिसून येत आहे.
फ्लेमिंगोसह विविध प्रजातींच्या पक्ष्यांची हजेरी
विणीच्या हंगामा पर्यंत मुक्काम
इंदापूर तालुक्‍यातील कुंभारगाव, डिकसळ, भादलवाडी, डाळज, पळसदेव, गंगावळण, आगोती या उजनीच्या पाणलोट क्षेत्रातील फुगवट्यावर फ्लेमिंगो, सिगल, थापट्या, शंभू बदक, ब्राह्मणी डक, स्पॉटबिल, स्पूनबिल, वारकरी, राखी बगळे व विविध प्रकारच्या पाणकावळ्यांचे आगमन झाले आहे. हे पक्षी नोव्हेंबरच्या पहिल्या आठवड्यात या ठिकाणी यायला सुरुवात करतात. सुरुवातीला त्यांची संख्या कमी असते. परंतु, डिसेंबरमध्ये त्यांची संख्या वाढते. पावसाळा सुरू होईपर्यंत येथे या पक्ष्यांचा मुक्काम असतो. दरम्यानच्या काळात विणीचा हंगाम उरकून नवजात पिल्लांच्या पंखात बळ आल्यानंतर येथून हे पक्षी परतीकडे मार्गस्थ होतात.
चार दशकांपासून पक्षांचा होतोय वावर
उजनी पाणलोट क्षेत्राच्या परिसरात असणारी नीरव शांतता तसेच रहदारीच्या रस्त्यापासून दूर तसेच या ठिकाणी पक्षांसाठी पूरक वातावरण उपलब्ध होत असल्याने गेली चार दशके फ्लेमिंगो पक्षी उजनी पाणलोट क्षेत्रावर सातत्याने येत आहेत.
हेही वाचा -मुंबईतील नाईट कर्फ्यू आज हटवणार
