पुणे -शिरूर तालुक्यातील जांबूत येथे रात्रीच्या सुमारास घराबाहेर बसलेल्या दोन वर्षाच्या चिमुकलीवर बिबट्याने अचानक हल्ला केल्याची धक्कादायक घटना घडली आहे. या हल्ल्यात मुलीचा मृत्यू झाला आहे. समृद्धी योगेश जोरी असे मृत मुलीचे नाव आहे.
हेही वाचा - दहा महिन्याच्या मुलाला जन्मदात्या आईने फेकले विहिरीत; शेलुबाजार येथील घटना
रात्री दहा वाजल्याच्या सुमारास बिबट्या शिकारीच्या शोधात योगेश जोरी यांच्या घराबाहेर दबा धरून बसला होता. समृद्धी जेवनानंतर घराबाहेर खेळत असताना दबा धरुन बसलेल्या बिबट्याने तिच्यावर अचानक हल्ला केला. काही क्षणाचा या हल्ल्याच्या थरारात बिबट्या मुलीला घेऊन पळून गेला. घरातील लोकांनी मुलीला वाचवण्याचा प्रयत्न केला मात्र ते अपयशी ठरले. जांबूत गावातील गावकऱ्यांच्या मदतीने मुलीचा रात्री उशिरापर्यंत शोध घेतल्यानंतर एका ऊसाच्या शेताच्या बाजूला तिचा मृतदेह आढळून आला.
बिबट्या आणि माणसाचा संघर्ष कधी थांबणार
गेल्या अनेक दिवसांपासून बिबट्याने शिकारीच्या शोधात या लोकवस्तीत वास्तव्य केले आहे. दिवसभर ऊसशेतीत राहून रात्रीच्या सुमाराम पाळीव प्राणी, माणसांवर हल्ला केल्याच्या घटना शिरूर, आंबेगाव जुन्नर, खेड तालुक्यात सतत घडत आहेत. यात लहान मुलांवर बिबट्याने हल्ला केल्याच्या घटना जास्त प्रमाणात घडल्या आहेत. या परिसरात मानव आणि बिबट यांच्यातील संघर्ष वाढला आहे. या संघर्षाची आता हद्द पार होत असल्याने वनविभागाने बिबट्याचा बंदोबस्त करावा, अशी तीव्र भावना नागरिक व्यक्त करत आहेत.
