पुणे - घरफोड्या आणि चोरी करणाऱ्या दोन अट्टल गुन्हेगारांना अटक करण्यात येरवडा पोलिसांना यश आले आहे. त्यांच्याकडून अलिशान गाडीसह १८ लाख ४५ हजार रूपयांचा मुद्देमाल हस्तगत करण्यात आला आहे. या आरोपींनी शहरात तब्बल ८८ गुन्हे केल्याचे तपासादरम्यान उघड झाले.
जयवंत उर्फ जयड्या गोवर्धन गायकवाड (वय ३२) आणि नितीन उर्फ हुबळ्या शंकर जाधव (वय २५) अशी आरोपींची नावे आहेत. आरोपी सुट-बुटामध्ये अलिशान मोटारीतून येऊन घरफोड्या आणि चोऱ्या करीत होते. अटकेनंतर पोलिसांनी त्यांची चौकशी केली असता त्यांनी शहरात ८८ घरफोड्या केल्याचे कबुल केले. आरोपींकडून ८४ ग्रॅमचे सोन्याचे दागिने, ९७ हजार रूपये रोख आणि एक अलिशान गाडी असा १८ लाख ४५ हजार रुपयाचा मुद्देमाल हस्तगत करण्यात आला आहे.
यातील आरोपी जयवंत गायकवाड हा सराईत घरफोड्या आहे, तर नितीन जाधव हा पाकिटमार करीत होता. येरवडा कारागृहात दोघांची ओळख झाली. बाहेर आल्यानंतर त्यांनी एकत्र चोऱ्या करण्यास सुरुवात केल्याचे समोर आले आहे.
