माळशेज घाटात कोसळली दरड; सहा तासानंतर रस्ता वाहतूकीसाठी खुला

माळशेज घाटातील करंजाळे येथील खिंडीजवळ मध्यरात्री दरड कोसळले होते. यामुळे तब्बल सहा तास हा रस्ता वाहतूकीसाठी बंद होता. दरम्यान, या मार्गावर वाहनांच्या मोठ्या रांगा लागल्या होत्या.

जुन्नर (पुणे) -माळशेज घाटातील करंजाळे येथील खिंडीजवळ बुधवारी (दि. 5 ऑगस्ट) मध्यरात्रीच्या सुमारास दरड कोसळल्याची घटना घडली आहे. तब्बल सहा तासांच्या प्रयत्नानंतर हा रस्ता आता वाहतुकीसाठी खुला करण्यात आला आहे. मात्र, अनेक ठिकाणी धोकादायक दरड असल्याने माळशेज घाट वाहतुकीसाठी धोकादायक बनत आहे.

वाट काढताना वाहन

माळशेज घाटमार्गे पुण्याहून मुंबईकडे व मुंबईकडून पुणे, अहमदनगर या दिशेने वाहतूक होते. मात्र, या घाटातच दरड कोसळल्याने माती व दगड रस्त्यावर पडले होते. यामुळे हा रस्ता सहा तास वाहतूकीसाठी बंद होता. त्यामुळे वाहनांच्या लांब लचक रांगा लागल्या होत्या.

यात भाजीपाला, शेतमाल, प्रवासी वाहतूक यांचा खोळंबा झाला होता. मात्र, आज (दि. 6 ऑगस्ट) सकाळी सार्वजनिक बांधकाम विभागाकडून तातडीने घाटातील रस्ता खुला करण्यात आला आहे. सध्या वाहतूक सुरळित सुरू आहे.

दरड कोसळली

गेल्या दोन दिवसांपासून माळशेज घाटात पावसाचा जोर सुरु आहे. या घाटात पावसाळ्यात दरडी कोसळण्याच्या घटना वारंवार होत असतात. यामुळे वाहतुकीसाठी हा मार्ग धोकादायक बनत आहे.माळशेज घाट पर्यटनासाठी बंद

पावसाळ्यात माळशेज घाटात अनेक ठिकाणी धबधबेच असतात. हे निसर्गरम्य दृश्य पाहण्यासाठी अनेक पर्यटक या घाटात गर्दी करत असतात. कोरोनामुळे यंदा पर्यटकांसाठी हा घाट बंद ठेवण्यात आला आहे. मात्र, वाहतूकीसाठी हा मार्ग खुला आहे.