पुणे : कोरोनाचा संसर्ग रोखण्यासाठी मंदिरातील देवदर्शन बंद ठेवण्यात आले आहे. या गोष्टीचा फायदा घेऊन दरोडेखोरांनी मंदिरांना लक्ष करायला सुरुवात केली आहे. जुन्नर तालुक्यातील आणे गावात कालिका माता मंदिरात भरदिवसा देवीचे दागिने चोरट्यांनी लंपास केल्याची घटना घडली आहे. महिनाभरापूर्वी ओझरच्या विघ्नहर गणपती मंदिरातदेखील चोरी झाली होती. त्यामुळे आता देव सुरक्षित नसल्याचे चित्र पहायला मिळत आहे.
जुन्नर तालुक्यातील आणे येथील कालिका माता मंदिरातील देवीच्या अंगावरील चांदीचे दागिने आणि मुकुट चोरीला गेला आहे. कालिका देवीचे पुजारी साईनाथ सासवडे यांनी दिलेल्या माहितीनुसार, 25 ऑगस्टला दुपारच्या सुमारास आणे इथल्या खालच्या पेठेत असलेल्या कालिका देवीच्या मंदिरात अज्ञात चोरट्याने प्रवेश केला. व देवीचा 1 किलो 200 ग्रॅम वजनाचा चांदीचा मुकुट व देवीच्या गळ्यातील एक तोळे वजनाचे मंगळसूत्र चोरून नेले.