शेतकऱ्यांना भेटू न देणे ही केंद्राची भूमिका दुर्दैवी - खासदार सुप्रिया सुळे

शेतकऱ्यांचे म्हणणे ऐकून घेण्यासाठी आम्ही दिल्ली येथे वेगवेगळ्या पक्षातील खासदार शेतकऱ्यांना भेटण्यासाठी गेलो होतो. मात्र यावेळी सीमेवरच आम्हाला रोखण्यात आले. अशी परिस्थिती जगाच्या कोणत्याही सीमेवर आजपर्यंत पाहिली नाही, अशी प्रतिक्रिया खासदार सुप्रिया सुळे यांनी बारामतीत पत्रकारांशी बोलताना दिली.

बारामती (पुणे) - शेतकऱ्यांचे म्हणणे ऐकून घेण्यासाठी आम्ही दिल्ली येथे वेगवेगळ्या पक्षातील खासदार शेतकऱ्यांना भेटण्यासाठी गेलो होतो. मात्र यावेळी सीमेवरच आम्हाला रोखण्यात आले. मी अनेकदा देशाच्या विविध सीमांवर अगदी वाघा बॉर्डरलाही अनेकदा गेले. मात्र या ठिकाणी कधीही आताच्या सारखी परिस्थिती पाहायला मिळाली नाही. आम्ही जेव्हा शेतकऱ्यांना भेटण्यासाठी गेलो तेव्हा हातात काठ्या घेऊन पोलिसांचा फौजफाटा मोठ्या प्रमाणात होता. जणू काय आम्ही त्या ठिकाणी गडबड गोंधळ करण्यासाठी आलोय की काय, या प्रकारची दुर्दैवी परिस्थिती त्या ठिकाणी पाहायला मिळाली. अशी परिस्थिती जगाच्या कोणत्याही सीमेवर आजपर्यंत पाहिली नाही, अशी प्रतिक्रिया खासदार सुप्रिया सुळे यांनी बारामतीत पत्रकारांशी बोलताना दिली.

केंद्र सरकारने सहानुभूतीने विचार करण्याची अपेक्षा -सध्या पेट्रोल-डिझेलचे दर वाढले आहेत. याबाबत खासदार सुळे यांना विचारले असता, त्या म्हणाल्या की, राष्ट्रवादीसह महाविकास आघाडीचे सर्व सहकारी याबाबत दिल्लीत आवाज उठवत आहोत. केंद्र सरकार शेतकरी व पेट्रोलसंबंधी सहानुभूतीने काहीतरी विचार करून निर्णय घेईल, अशी अपेक्षा त्यांनी व्यक्त केली.बारामती मतदारसंघ देशात प्रथम -केंद्र सरकारद्वारे चालवल्या जाणाऱ्या वयोश्री योजनेत बारामती मतदारसंघ हा प्रथम क्रमांकावर आहे. दरवर्षी हा उपक्रम राबवला जातो. या योजनेत पात्र असणाऱ्यांन शंभर टक्के सामावून घेण्याचा प्रयत्न असणार आहे. यासाठी एप्रिलमध्ये मेगा कॅम्प घेणार असल्याचे तसेच सामुदायिक विवाह सोहळ्याचे आयोजन करण्यात येणार असल्याचे खासदार सुळे यांनी सांगितले.