पुणे (पिंपरी) - काँग्रेसला पाच वर्षे विधान परिषदेचे अध्यक्ष पद देण्यात आले होते. परंतु, नाना पटोले यांनी अध्यक्ष पदाचा राजीनामा दिल्याने मुख्यमंत्री उद्धव ठाकरे, उपमुख्यमंत्री अजित पवार नाराज असल्याची चर्चा राजकीय वर्तुळात रंगली आहे. दरम्यान, यावर मंत्री सुभाष देसाई यांनी भाष्य केले. मुख्यमंत्री आणि उपमुख्यमंत्री यांच्यात नाराजी नाही. पटोले चांगलं काम करत होते म्हणून ते हवे होते, अस त्यांनी म्हटलं आहे. तसेच फडणवीस यांना आणखी पाच वर्षे सत्तेसाठी स्वप्न बघावी लागतील, असा टोला सुभाष देसाई त्यांनी लगावला आहे.
राज्यमंत्री सुभाष देसाई
मुख्यमंत्री आणि उपमुख्यमंत्री यांच्यात नाराजी नाही-
सुभाष देसाई म्हणाले की, उपमुख्यमंत्री आणि मुख्यमंत्री यांच्यात नाराजी नाही. नाना पटोले हे अधिक काळ अध्यक्ष म्हणून हवे होते. इतक चांगलं काम त्यांचं होतं. परंतु, त्यांचे पक्षांतर्गत विचार असल्यामुळे त्यांनी दुसऱ्या पदावर जाण्यासाठी विधान परिषदेचे अध्यक्ष पद रिक्त केलं आहे. ते कुठल्याही पदावर गेले तरी महाराष्ट्राची सेवाच होईल, असा विश्वास सुभाष देसाई यांनी व्यक्त केला.
फडणवीस यांना पाच वर्षे स्वप्न पाहावी लागणार-
विरोधी पक्ष नेते देवेंद्र फडणवीस यांनी मुंबईमध्ये जाहीर भाषणामध्ये शिडीशिवाय आम्ही फासे पलटवू आणि हे फासे खूप मोठे असतील, असे म्हणत महाविकास आघाडीवर भाष्य केले होते. त्यावर सुभाष देसाई म्हणाले की, फडणवीस यांना पाच वर्षे स्वप्न बघावे लागेल. महाविकास आघाडी सरकारचे एकच वर्ष पूर्ण झालं आहे. त्यांना आणखी चार वर्षे थांबाव लागेल. असे अंदाज व्यक्त करण्यापलीकडे त्यांचा हातात काही नाही. महाविकास आघाडीचे सरकार स्थिर आहे. मुख्यमंत्री उद्धव ठाकरे यांच्यावर जनतेने विश्वास दाखवला आहे. त्यामुळं आम्ही पाच वर्षे पूर्ण करू, ही खात्री असल्याचे देसाई म्हणाले आहेत.