पुणे- टाळ-मृदुंगाच्या गजरात आज सकाळी संत तुकाराम महाराजांची पालखी देहूतील इनामदार वाड्यातून पंढरपूरच्या दिशेने मार्गस्थ झाली. यावेळी तुकाराम महाराजांच्या पादुकांचे देहू येथील इनामदार वाड्यात पुण्याचे पालकमंत्री चंद्रकांत पाटील यांच्या हस्ते पुजन करण्यात आले. यावेळी वारकऱ्यांच्या आनंदाला उधाण आले होते. महाराजांची पालखी आज आकुर्डी येथे विसाव्यासाठी थांबणार आहे.
यावेळी विभागीय आयुक्त डॉ. दिपक म्हैसेकर, जिल्हाधिकारी नवल किशोर राम, जिल्हा परिषदेचे प्रभारी मुख्य कार्यकारी अधिकारी प्रभाकर गावडे, पिंपरी चिंचवडचे पोलीस आयुक्त आर. के. पदमनाभन, संत तुकाराम महाराज संस्थानचे विश्वस्त आदी उपस्थित होते.
संत तुकाराम महाराज यांच्या पालखीचे सोमवारी देहूमधून प्रस्थान झाल्यानंतर पालखी इनामदार वाड्यामध्ये मुक्कामी होती. तर मंगळवारी आकुर्डी येथे थांबणार आहे. त्यानंतर बुधवारी संत तुकाराम आणि संत ज्ञानेश्वर महाराजांच्या पालख्या पुण्यामध्ये मुक्कामी असणार आहेत.