पुणे - येथील विद्यापीठ चौकात औंधकडे जाणाऱ्या रस्त्यावर शुक्रवारी संध्याकाळी एका चारचाकीला आग लागून ती पूर्ण जळून खाक झाल्याची घटना घडली. गाडीतील प्रवासी वेळीच बाहेर आल्याने अपघात टळला.
पुणे विद्यापीठ चौकात शुक्रवारी सायंकाळच्या सुमारास धावत्या गाडीला अचानक आग लागली. गाडीला आग लागल्याचे लक्षात येताच गाडीतील प्रवाशांनी तातडीने बाहेर पळ काढला. त्यामुळे सुदैवाने कोणतीही जीवितहानी झाली नाही. मात्र, आग भडकल्याने गाडी पूर्णपणे जळून खाक झाली. अग्निशमन दलाच्या जवानांना याठिकाणी पाचारण करण्यात आले होते. मात्र, ते पोहोचेपर्यंत गाडी पूर्णपणे जळून खाक झाली होती. गाडीला आग लागल्याने या रस्त्यावरील वाहतूक खोळंबली होती. अग्निशमन दलाने गाडीला लागलेली आग विझवली. त्यानंतर या चारचाकीला रस्त्याच्या बाजूला घेण्यात आले आणि वाहतूक पुन्हा सुरळीत सुरू झाली. दरम्यान आग लागण्याचे कारण अद्याप समोर आलेले नाही.