मृग नक्षत्रातील वळवाच्या पावसात दुर्मिळ राणी किड्यांचे दर्शन

उत्तर पुणे जिल्ह्यात सर्वत्र वळवाचा पाऊस पडताच मृगाचे मखमली किडे (राणी किडे) बाहेर पडले असून ते पाहण्याचा आनंद अनेकजण घेत आहेत.

पुणे- उत्तर पुणे जिल्ह्यात सर्वत्र वळवाचा पाऊस पडताच मृगाचे मखमली किडे (राणी किडे) बाहेर पडले असून ते पाहण्याचा आनंद अनेकजण घेत आहेत. मृग नक्षत्र सुरू झाले की हे गर्द लाल रंगाचे किडे बाहेर पडतात. या किड्यांचे आयुष्य काही दिवसांपुरतेच असते. डोंगराळ भागात या किड्यांची संख्या जास्त आहे.

मृग नक्षत्रात येणाऱया या किड्यांचे अनेक शेतकरी रक्षण करतात. ज्यावर्षी हे किडे जास्त प्रमाणात असतात त्यावर्षी पाऊस मुबलक पडतो, असा शेतकऱ्यांचा अंदाज आहे. यावर्षी मोसमी पाऊस उशिराने सुरू झाला असला तरी वळवाचा पाऊस गेल्या तीन दिवसांपासून पडत असल्याने मृग नक्षत्राचे किडे (लाल मखमली किडे)अनेक ठिकाणी पहावयास मिळत आहेत.

हे किडे पाहण्याचा अनेकजण आनंद घेत आहेत. मात्र, ही प्रजाती नष्ट होण्याच्या मार्गावर आहे. या किड्यांचे आयुष्य किती याबाबत माहिती उपलब्ध होत नाही. मात्र, आठ ते पंधरा दिवसात दिसणारे हे लाल भडक रंगाचे मृग किडे सर्वांचेच आकर्षण ठरत आहेत.

मृग नक्षत्रातच हा किडा दिसतो म्हणून याला "मृगाचा किडा" म्हणतात. यावरूनच त्याला तेलगुमध्ये "आरुद्रा (नक्षत्र) पुरुगू" म्हणतात. संस्कृत मधे " बिरबाहुती ", तर उर्दूत "राणी किडा", म्हणतात. मराठीत मखमली किडा, गोसावी किडा (त्याच्या शरीरावर भगवी चमक असलेल्या मखमलीमुळे) या नावाने ओळखतात. इंग्रजीत "रेड वेलवेट माईट" आणि शास्त्रिय भाषेत "हॉलोस्ट्रीक" या नावने हा ओळखला जातो.