पुणे- लालू प्रसाद यादव यांना तुरुंगात पाठवणारा वकील मीच आहे. राम जन्मभूमीची केस जिंकणाराही वकील मीच आहे. मी स्वयंसेवक आहे आणि भाजपचा कार्यकर्ता आहे, अशा शब्दात केंद्रीय मंत्री रवी शंकर प्रसाद यांनी स्वतः ची ओळख करून दिली. पुण्यात वकिलांच्या संघटनेने आयोजित केलेल्या 'संवाद' या कार्यक्रमात ते बोलत होते.
या कार्यक्रमाच्या सुरुवातीला आयोजकांनी रवी शंकर प्रसाद यांची ओळख करून देताना ते कायदेमंत्री आहेत असे सांगितले. त्यानंतर बोलताना रवी शंकर म्हणाले, फक्त कायदेमंत्री इतकीच माझी ओळख नाही, तर चारा घोटाळा करणाऱ्या लालू प्रसाद यादव यांना तुरुंगात पाठवणारा वकील मीच आहे. वर्षानुवर्षे प्रलंबित असलेला रामजन्मभूमीची केस जिंकणारा वकीलही मीच आहे. परंतु माझी ही ओळख कुणीही करून देत नसल्याचे सांगत त्यांनी खंत व्यक्त केली.