रांजणगाव : महिलेचा विनयभंग करून फरार झालेला आरोपी अखेर जेरबंद

रांजणगावमध्ये घरात घुसून महिलेचा विनयभंग करणाऱ्या आणि जीवे मारण्याची धमकी देणाऱ्या फरार आरोपीला अटक करण्यात आली आहे. श्रीकांत मिनीनाथ जगदाळे असे अटक करण्यात आलेल्या आरोपीचे नाव आहे. पोलिसांनी सापळा रचून या आरोपीला कारेगाव परिसरात पकडले.

पुणे - रांजणगाव पोलीस ठाण्याच्या हद्दीत महिलेचा विनयभंग करून जीवे मारण्याची धमकी देणाऱ्याला स्थानिक गुन्हा अन्वेषण विभागाच्या पथकाने पकडले आहे, याची माहिती गुन्हे अन्वेषण विभागाचे पोलीस निरीक्षक पद्माकर घनवट यांनी दिली आहे. श्रीकांत मिनीनाथ जगदाळे (रा. करडे, ता. शिरूर, जि. पुणे) असे अटक करण्यात आलेल्या आरोपीचे नाव आहे.

विनयभंग करून जीवे मारण्याची धमकी

5 जून रोजी एक महिला एकटीच घरात होती. यावेळी आरोपी श्रीकांत मिनीनाथ जगदाळे याने संबंधित महिलेच्या घरात येऊन तिचा विनयभंग केला. शिवाय तिला जीवे मारण्याची धमकीही दिली. याबाबतची तक्रार संबंधित पीडितेने रांजणगाव पोलीस ठाण्यात दिली. त्यानुसार, पोलिसांनी विनयभंग व जीवे मारण्याची धमकी दिल्याचा गुन्हा दाखल केला होता. परंतु आरोपी या घटनेनंतर फरार होता.

फरार आरोपी सापळा रचून अटक

दरम्यान, 5 जूननंतर बुधवारी (16 जून) कारेगाव परिसरात संबंधित फरार आरोपी येणार असल्याची माहिती स्थानिक गुन्हे अन्वेषण शाखेच्या पथकाला मिळाली. त्या अनुषंगाने स्थानिक गुन्हे शाखेच्या पथकाने सापळा रचून त्यास ताब्यात घेतले.

हेही वाचा -शिवसेना भवनसमोर भाजपचे फटकार आंदोलन; सेना कार्यकर्तेही आक्रमक