पुणे Pune Accident News :पुण्यात हिट अ‍ॅंड रन सारखा प्रकार समोर आलाय. शहरातील सेनापती बापट रोड, वेताळबाबा चौकात पीएमटी बस चालकानं दारू पिऊन दहा ते पंधरा गाड्यांना उडवलय. या बसमध्ये तब्बल 50 प्रवाशी होते. दारूच्या नशेत चालकानं बस मागील दिशेनं चालवत सुमारे 10 ते 15 गाड्यांना उडवलंय. या बसचालकाविरोधात शहरातील चतुशृंगी पोलीस स्टेशनमध्ये सदोष मनुष्यवधाचा गुन्हा दाखल करण्यात आलाय. निलेश सावंत असं या बसचालकाचं नाव आहे.
मोठी दुर्घटना टळली : वारंवार अशाप्रकारच्या घटना घडत असल्यानं पुण्यातील पीएमपीएल प्रशासनावरसुद्धा आता याला शिस्त लावण्याची वेळ आलीय. सुदैवानं या घटनेत बसमधील प्रवाशांना कुठली हानी झाली नाही. यावेळी अनेक नागरिकांनी वाहनांना थांबवण्याचा प्रयत्न केला. बसच्या मागे किंवा पुढे जाऊ नका, अशी विनंती केली. त्यामुळं मोठा अनर्थ टळला. मात्र, बस मागे घेताना ज्या गाड्यांना उडवलं त्या गाड्याचं मोठं नुकसान झालंय. तसंच या गाड्यातील काही नागरिक जखमी झाल्याचीही माहिती आहे. कृष्णा जाधव या व्यक्तीनं या पीएमपीएल बसची काच फोडून ही गाडी थांबवली. या पीएमपीएल बसच्या पाठीमागे जवळपास बऱ्याच मोठ्या लांबपर्यंत गाड्यांची रांग लागली होती. जर ही गाडी थांबवली नसती, तर यामध्ये अनेकांचे बळी जाण्याची शक्यता होती. त्यामुळं पीएमपीएल प्रशासन यावर काही उपाययोजना करणार की, थोड्या दिवसांनी संतोष माने प्रकरणाची पुनरावृत्ती होणार हे पहावं लागेल.