पुणे- मुंढवा परिसरात रस्त्यावरील अतिक्रमण हटवताना पोलीस आणि विक्रेत्यांमध्ये वाद निर्माण झाला. त्यानंतर पोलिसांनी वृद्ध महिलेला मारहाण केल्याची धक्कादायक घटना समोर आली आहे. या मारहाणीचा व्हिडिओ सध्या सोशल मीडियावर व्हायरल झाला आहे.
पुण्यातील हडपसर परिसरातील रेल्वे ब्रिज ते भीमनगर रस्त्यावर विक्रेत्यांनी अनधिकृतपणे आपली दुकाने मांडली होती. या अनधिकृतपणे बसलेल्या विक्रेत्यांवर अतिक्रमण विभाग व पोलीस कारवाई करीत होते. कारवाई दरम्यान अनेक अनधिकृत विक्रेत्यांना पोलिसांनी भर रस्त्यात, गर्दीसमोर मारहाण केली. तसेच भीमनगर परिसरात चहा विक्रीचा व्यवसाय करून कुटुंबाचा उदरनिर्वाह चालविणाऱ्या वृद्ध महिलेलाही पोलिसांनी मारहाण केली. पोलिसांद्वारे केलेल्या या अमानूष वागणुकीचा व्हिडिओ सोशल मीडियावर व्हायरल झाला आहे.