पुणे- जिल्ह्यातील ग्रामीण भागात कोरोनाचा संसर्ग वाढत असताना जुन्नर तालुक्यात मास्क न घालता, सोशल डिस्टन्सिंगचे नियम न पाळता, मोठी गर्दी जमवून धुमधडाक्यात लग्न समारंभ पार पडल्याची धक्कादायक घटना घडली आहे. हा लग्न समारंभ जुन्नर तालुक्यातील वळगांव आनंद येथे पार पडला असून याप्रकरणी आळेफाटा पोलिसांनी वधू-वरांसह कुटुंबीयांवर गुन्हा दाखल केला आहे.
कोरोनाचा समुह संसर्ग टाळण्यासाठी विवाह सोहळ्यांना काही अटी आणि शर्ती घालून परवानगी देण्यात आली आहे. मात्र, या अटी आणि शर्तींचे पालन न करता वडगाव आनंद येथील रुचिका देवकर आणि प्रथमेश वाळुंज हे 19 मे रोजी धूमधडाक्यात विवाह बंधनात अडकले. या दोन प्रतिष्ठित कुटुंबांनी विवाह सोहळा आयोजित केला होता. या लग्न सोहळ्यात जेवणावळीसह लग्नात तुंबळ गर्दी पहायला मिळाली. मात्र, हा विवाह होत असताना वर-वधू पक्षाकडील दोन्ही कुटुंबीयांकडून सरकारच्या नियम आणि अटींचे पालन केले गेले नाही. या लग्नात 100 ते 150 नातेवाईक एकत्र आले होते.