निर्बंधातही सुरू आहे 'पीएमपीएमएल'चे काम, देत आहे 'या' सेवा

वाढत्या कोरोनाच्या पार्श्वभूमीवर राज्यात कडक निर्बंध लावण्यात आले आहेत. अत्यावश्यक सेवा वगळता पुणे व पिंपरी-चिंचवड येथील सार्वजनिक वाहतूक बंद आहे. मात्र, अत्यावश्यक सेवेतील कर्मचाऱ्यांसाठी पीएमपीएमची सेवा सुरू आहे.

पुणे- वाढत्या कोरोनामुळे पुण्यातील सार्वजनिक वाहतूक असलेली पीएमपीएमएलही बंद करण्याचा निर्णय घेण्यात आला. तरी अत्यावश्यक सेवेसह पुणे आणि पिंपरी-चिंचवड महापालिकेच्या विविध कोविड रुग्णालय, तसेच लसीकरण केंद्र येथेही पीएमपीएमएलचे कर्मचारी काम करत आहे. पहिल्या लाटेसह दुसऱ्या लाटेत ही पीएमपीएमएलचे चालक वाहक हे विविध रुग्णालयात कोविडचे काम करत आहे. त्याचबरोबर पीएमपीएमएलकडून कायमस्वरूपी असलेल्या कर्मचाऱ्यांना एक दिवसआड कामावर बोलावून विविध दैनंदिन कामकाजासह डेपोची स्वच्छता देखील केली जात आहे, अशी माहिती पीएमपीएमएलचे व्यवस्थापकीय संचालक डॉ. राजेंद्र जगताप यांनी दिली.

अत्यावश्यक सेवेसाठी 125 बसेस

3 एप्रिलपासून वाढत्या कोरोनाच्या पाश्वभूमीवर पुण्यातील पीएमपीएमएल बंद करण्यात आली आहे. पीएमपीएमएलच्या 1 हजार 800 बसेसपैकी 125 बसेस हे अत्यावश्यक सेवेसाठी वापरले जात आहे. त्याचबरोबर 2 हजार 500 हून अधिक कर्मचारी हे दोन्ही महापालिकेच्या कोविड सेंटरमध्ये काम करत आहे. पीएमपीएमएलमध्ये तब्बल 10 हजारहून अधिक कामगार करत आहे. त्यातील काही अत्यावश्यक सेवेसाठी तर काही कोविड सेंटरमध्ये तर काहींना दिवसाआड बोलावून विविध डेपोतील काम करत आहे.

शहरात पीएमपीएमएल सुरू करणार कुरिअर सेवा

दररोज अकरा लाख पुणेकरांचा प्रवास घडविणारी पीएमपीएमएल आता कार्गो आणि कुरिअर सेवा देणार आहे. काही खासगी कुरिअर कंपन्यांबरोबर मिळून ही सेवा सुरू होणार आहे. रोज दीड हजारांपेक्षा जास्त पीएमपी बसेस सुमारे 1 हजार 900 किलोमीटर अंतरावर जात असतात. त्याचबरोबर तीनशेहून अधिक वेगवेगळ्या मार्गावर त्या धावतात. त्यामुळे पीएमपी कुरिअर सेवाही त्या त्या मार्गावर जाऊन कुरिअर सेवा देणार आहे.लवकरच ही सेवा सुरू देखील करण्यात येणार आहे, अशी माहिती पीएमपीएमएलचे व्यवस्थापकीय संचालक डॉ. राजेंद्र जगताप यांनी दिली.

येत्या शनिवारी रक्तदान शिबिराचे आयोजन

पुणे व पिंपरी चिंचवड शहरातील कोरोनाच्या वाढत्या प्रादुर्भावामुळे निर्माण होणारा रक्ताचा तुटवडा लक्षात घेऊन तसेच राज्यात होत असलेला रक्ताचा तुटवडा लक्षात घेत पीएमपीएमएलच्या वतीने शहरात 15 ठिकाणी रक्तदान शिबिराचे आयोजन करण्यात आले आहे. या शिबिरात 5 हजारपेक्षा जास्त रक्ताच्या बॅगचे संकलन करण्याचा संकल्पही करण्यात आले आहे.

हेही वाचा -अभ्यास का करत नाही म्हणत पित्याची मुलीला बेदम मारहाण