पुणे - दापोडी येथे एका तरुणाने तोंडाला रुमाल बांधला असतानादेखील विनामास्क फिरत असल्याचे सांगत पिंपरी चिंचवड पालिका आणि पोलीस प्रशासनाने दीडशे रुपये दंड केला आहे. या प्रकरणाची व्हाट्सअॅप आणि फेसबुकवर एक पोस्ट व्हायरल झाली आहे. या घटनेप्रकरणी तरुण प्रताप गुंजाळ याने विनाकारण दंड केल्याचा आरोप केला असून, पालिकेवर तीव्र नाराजी व्यक्त केली आहे.
पिंपरी-चिंचवडमध्ये तोंडाला रुमाल बांधला असतानाही तरुणाला दंड यावेळी बोलताना प्रताप गुंजाळ म्हणाला की, मी दापोडी येथून दुचाकीवर जात होतो. त्यावेळी मला पोलिसांनी थांबवलं. मला वाटलं काही काम असेल पण महानगर पालिकेचे कर्मचारी आले आणि त्यांनी मला पाचशे रुपयांचा पावती करायला सांगितले. मी तोंडाला रुमाल बांधला असे सांगितले असतानाही मास्क नाही म्हणून दीडशे रुपयांची रीतसर पावती देऊन त्यांनी दंड घेतला. त्यांच्यासोबत पोलीस असल्याने दबावामुळे पैसे दिल्याचे प्रतापने सांगितले.
इतर तरुणांना पोलीस जाऊ देत होते, हे सांगूनही त्यांनी मलाच थांबवून रुमाल बांधला असतानाही दंड केला आहे. हा विनाकारण दंड केला असून, जे नागरिक विनामास्क फिरतात त्यांना सोडून आमच्यासारख्या तरुणांना टार्गेट करण्याच्या हेतूने दंड केला जात असल्याचे प्रतापचे म्हणणे आहे.
