पुणे- शहराला पाणी पुरवठा करणाऱया धरण क्षेत्रात समाधानकारक पाऊस झाला आहे. त्यामुळे धरणांच्या पाणी पातळीत सातत्याने वाढ होत आहे. पिंपरी-चिंचवड शहराला पाणीपुरवठा करणारे पवना धरण हे ८९.२९ टक्के भरले आहे. यामुळे शहरावरचे पाणी कपातीचे संकट टळण्याची शक्यता आहे. पवना धरण भरल्यामुळे शहरातील नागरिकांमध्ये आनंदी वातावरण आहे.
गेल्या काही दिवसांपासून धरण पाणलोट क्षेत्रात जोरदार पाऊस झाला आहे. त्यामुळे पवना धरण हे तुडुंब भरले आहे. दरम्यान, शहरातील पाणी पुरवठा हा दिवसाआड होत आहे. पाऊस झाला नसता तर पाणी कपातीची संकट अधिक गडद झाले असते. गेल्या वर्षीच्या तुलनेत यावर्षी पवना धरणात पाणी साठा कमी असला तरी तो समाधानकारक आहे. गेल्या वर्षी याच वेळेस धरणातील पाणीसाठा तब्बल ९७.४५ टक्के एवढा होता. तसेच पाणलोट क्षेत्रात देखील २१४० मिमी पाऊस झाला होता. मात्र, या वेळेस २०१८ मिमी एवढा पाऊस झाला आहे. धरणाची एकूण साठवण क्षमता ८.२९ टीएमसी एवढी आहे त्यापैकी ७.०६ टीएमसी एवढा पाणीसाठा धरणात आहे. धरणातील पाणीसाठा पाहिला असता पिंपरी-चिंचवडकरांचा वर्षभराचा पाणी प्रश्न मिटला आहे. पवना धरण पाहण्यासाठी अनेक पर्यटक गर्दी करत आहेत. त्याठिकाणी हवेत गारवा निर्माण झाल्याने सतत पाऊस कोसळत असतो. त्याचा आनंद देखील अनेक पर्यटक घेत आहेत.
