मुक्त विद्यापीठाच्या अंतिम वर्षाच्या परीक्षा होणार का? विद्यार्थ्यांचा सरकारला सवाल

कोरोनामुळे निर्माण झालेल्या परिस्थितीमुळे व्यावसायिक अभ्यासक्रमांच्या अंतिम वर्षाच्या परीक्षा घेता येणार नाहीत, असा निर्णय महाराष्ट्राच्या उच्च तंत्र शिक्षण मंत्रालयाने जाहीर केला आहे. परंतु, मुक्त विद्यापीठातील अंतिम वर्षाच्या परीक्षा होणार आहेत की नाही? यावर मात्र सरकार काही बोलायला तयार नाही.

पुणे - कोरोनामुळे निर्माण झालेल्या परिस्थितीमुळे व्यावसायिक अभ्यासक्रमांच्या अंतिम वर्षाच्या परीक्षा घेता येणार नाहीत, असा निर्णय महाराष्ट्राच्या उच्च तंत्र शिक्षण मंत्रालयाने जाहीर केला आहे. परंतु, मुक्त विद्यापीठातील अंतिम वर्षाच्या परीक्षा होणार आहेत की नाही? यावर मात्र सरकार काही बोलायला तयार नाही. आमच्या परीक्षा होणार आहेत की नाही? इतकं तरी सांगा असा सवाल या विद्यार्थ्यांकडून केला जातोय.

राज्यात मुक्त विद्यापीठमध्ये शिक्षण घेणारे अनेक विद्यार्थी आहेत. आपली नोकरी व्यवसाय सांभाळून हे विद्यार्थी शिक्षण घेत असतात. येन परीक्षेच्या तोंडावर कोरोनाचे संकट उद्धभवले आहे. अनेक शाळा, महाविद्यालयातील परीक्षा रद्द करण्यात आल्या आहेत. जून महिन्यात सुरू होणारी शाळा, महाविद्यालयं अजूनही उघडली नाहीत. या सर्व पार्श्वभूमीवर राज्य शासनाकडून जीआर काढून या शाळा महाविद्यालयांना वेळोवेळी सूचना केल्या जात आहेत. परंतु, या जीआरमध्ये मुक्त विद्यापीठासाठी कोणतेही निर्देश नाहीत असे मुक्त विद्यापीठात शिक्षण घेणाऱ्या विद्यार्थ्यांचे म्हणणे आहे. शासनाने या विद्यार्थ्यांचा विचार करून परिक्षा होणार आहेत की नाही यासंबंधी माहिती द्यावी अशी मागणी विद्यार्थ्यांनी केलीय.

इंदिरा गांधी मुक्त विद्यापीठात एमएसडब्ल्यूच्या द्वितीय वर्षात असलेली तहशीन शेख म्हणाली की, महाराष्ट्र सरकारने अंतिम वर्षाच्या विद्यार्थ्यांसाठी जो निर्णय घेतला तसाच निर्णय मुक्त विद्यापीठातील परीक्षेच्या बाबतीतही घेण्यात यावा. महाराष्ट्र सरकारने आतापर्यंत घेतलेल्या निर्णयात दूरस्थ शिक्षण विभागविषयी काहीही सांगितले नाही. त्यामुळे सर्व विद्यार्थी संभ्रमाव्यवस्थेत आहेत. आमच्या परीक्षा होणार आहेत की नाही एवढं तरी आम्हाला सरकारने सांगावं. कोरोनामुळे निर्माण झालेल्या परिस्थितीमुळे अनेक विद्यार्थी आपापल्या गावी गेले आहेत. त्यांना आता पुण्यात परत येणे, हॉल तिकीट मिळवणे यासारख्या अडचणीला तोंड द्यावे लागत आहे. शिवाय कोरोनाची भीती आहेच. अशा परिस्थितीत आम्ही परीक्षा तरी कशी द्यावी असा सवाल एमएसडब्ल्यूच्या द्वितीत वर्षात शिक्षण घेत असलेल्या पल्लवी गायकवाड या विद्यार्थ्यांनीने उपस्थित केला आहे. दरम्यान, मुक्त विद्यापीठाच्या परीक्षासंबंधी विद्यार्थी वारंवार रिजनल सेंटर, प्राध्यापक यांच्याशी संपर्क साधण्याचा प्रयत्न करतात परंतु तिथेही त्यांना योग्य ती माहिती मिळत नाही. त्यामुळे येथील विद्यार्थ्यांमध्ये सध्या गोंधळाचे वातावरण आहे. सरकारने पुढाकार घेत बहिस्थ विद्यार्थ्यांच्या परिक्षेबाबत लवकरात लवकर निर्णय घ्यावा अशी मागणी विद्यार्थ्यांनी केली.