पुणे - कोरोनामुळे पुणे जिल्ह्यातील सर्व शाळा ३१ मार्चपर्यंत बंद ठेवण्यात आल्या आहेत. याचा विद्यार्थ्यांच्या अभ्यासावर परिणाम होऊ नये, यासाठी वाबळेवाडी येथील जिल्हा परिषदेच्या शाळेतील विद्यार्थी आणि शिक्षकांनी झूम-मीटिंग अ‌ॅप्लिकेशनद्वारे दररोज तीन तासांचे ऑनलाईन शिक्षण सुरू केले आहे.
वाबळेवाडी शाळेत ऑनलाईन शिक्षण प्रणाली सुरू
वाबळेवाडीच्या भारतरत्न अटल बिहारी वाजपेयी जिल्हा परिषद शाळा कमी दिवसात नावारूपाला आली आहे. नवनवीन तंत्रज्ञानाची जोड घेऊन जिल्हा परिषदेच्या या शाळेने जागतिक पटलावर तिसरा क्रमांक मिळवला आहे. सध्या कोरोनाच्या सावटामुळे ऐन परीक्षेच्या दिवसात शाळा बंद ठेवण्यात आल्या आहेत. त्यामुळे यावर उपाय शोधून विद्यार्थी आणि शिक्षकांनी ऑनलाईन शिक्षण पद्धतीचा वापर सुरू केला आहे.