सून नातवाला भेटू देत नसल्याने आजोबांचा आत्महत्येचा प्रयत्न, पोलिसांच्या सतर्कतेने वाचले प्राण

उत्तमनगर पोलीस ठाण्याच्या हद्दीत जीलानी मशिदीसमोर हा प्रकार घडला. पोलिसांनी सतर्कता दाखवत त्यांना वेळीच रुग्णालयात दाखल केल्याने त्यांचे प्राण वाचले.

पुणे -दीड वर्षांच्या नातवाला सून भेटू देत नसल्याने आलेल्या नैराश्यातून एका ज्येष्ठ नागरिकाने विषारी द्रव्य प्राशन करून आत्महत्येचा प्रयत्न केला. उत्तमनगर पोलीस ठाण्याच्या हद्दीत जीलानी मशिदीसमोर हा प्रकार घडला. सुरेश माधवराव कुलकर्णी असे आत्महत्येचा प्रयत्न करणाऱ्या नागरिकाचे नाव आहे. पोलिसांनी सतर्कता दाखवत त्यांना वेळीच रुग्णालयात दाखल केल्याने त्यांचे प्राण वाचले.

पोलिसांनी दिलेल्या माहितीनुसार, सुरेश कुलकर्णी यांच्या मुलाचा प्रेमविवाह झाला असून त्याला दीड वर्षांचा मुलगा आहे. परंतु काही कारणामुळे त्यांची सून मुलाला घेऊन माहेरी राहत आहे. दरम्यान, नातवाचा लळा लागलेल्या सुरेश कुलकर्णी यांनी नातवाला भेटण्याचा प्रयत्न केला. परंतु सुनेने त्यांना भेटू दिले नाही. याच नैराश्यातून त्यांनी झोपेच्या गोळ्या खाल्ल्या आणि कीटकनाशक प्राशन केले होते. जीलानी मशिदीसमोरील रस्त्यावर ते बेशुद्धावस्थेत पडले होते. पोलिसांना सोमवारी (१५ एप्रिल) ही माहिती मिळताच त्यांनी तत्काळ घटनास्थळी धाव घेत त्यांना रुग्णालयात दाखल केले. त्यांच्या खिशात किटकनाशकाची बाटली आणि चिट्ठी होती. पोलिसांनी कुलकर्णी यांच्या फोनवरून त्यांच्या पत्नीला फोन करून रुग्णालयात बोलावून घेतले. अशा प्रकारे पोलिसांनी सतर्कता दाखवत एका ज्येष्ठ नागरिकाचे प्राण वाचवले