ग्रामपंचायत निवडणुकीसाठी ऑफलाईन अर्ज भरण्यासाठी इच्छुकांची धावपळ

पुणे जिल्ह्यातील अनेकांचे अर्ज भरले न गेल्याने ऑफलाईन अर्ज भरण्यासाठी मोठी गर्दी झाली आहे. पुण्यात गणेश कला क्रीडा मंच येथे पहाटेपासूनच अनेक जण केंद्रावर रांगा लावून आहेत. ऑफलाईन अर्ज भरण्यासाठी उमेदवारांची पळापळ होताना याठिकाणी दिसत असल्याचे चित्र होते.

पुणे- ग्रामपंचायतीच्या निवडणूक अर्जासाठीचा गोंधळ सुरूच असून ऑनलाइन अर्ज भरताना सर्व्हर डाऊन असल्याने 'ऑफलाईन' अर्ज प्रणाली सुरू करण्यात आली आहे. या निवडणुकींसाठी अर्ज भरण्याचा आजचा शेवटचा दिवस आहे. मात्र, अर्ज भरले जात नसल्याने इच्छुकांची धांदल उडाली आहे.

पुणे जिल्ह्यातील अनेकांचे अर्ज भरले न गेल्याने ऑफलाईन अर्ज भरण्यासाठी मोठी गर्दी झाली आहे. पुण्यात गणेश कला क्रीडा मंच येथे पहाटेपासूनच अनेक जण केंद्रावर रांगा लावून आहेत. ऑफलाईन अर्ज भरण्यासाठी उमेदवारांची पळापळ होताना याठिकाणी दिसत असल्याचे चित्र होते. एकंदरीतच किचकट अर्ज प्रणाली असल्याने अनेकांचा हिरमोड झाला. १६ पानी अर्ज असल्याने अर्ज भरण्यासाठी वेळ कमी पडेल म्हणून मुदत वाढवून देण्याची मागणी उमेदवारांनी केली.

उमेदवारांची अर्ज भरण्याला मोठी गर्दी

पुणे जिल्ह्यात 746 ग्रामपंचायतींसाठी निवडणूक होते आहे. ग्रामपंचायत निवडणूक म्हटली की, अनेक हौसे-नवसे या निवडणुकीसाठी कंबर कसून असतात. त्यात ऑनलाइन अर्ज भरताना अनेकांना त्रास होत होता, अडचणी येत होत्या. त्यामुळे अर्ज भरण्याचा आजचा शेवटचा दिवस असताना 'ऑफलाईन'ची सोय पुण्यातील स्वारगेटच्या गणेश कला क्रीडा मंचात करण्यात आली होती. त्यासाठी उमेदवारांनी अर्ज भरण्याला मोठी गर्दी केली, एकंदरीतच शेवटचा दिवस असल्याने उमेदवारांची एकच धावपळ पाहायला मिळाली.