परीक्षेच्या आदल्या दिवशी आईचा मृत्यू, अंत्यदर्शन घेऊन तिने दिला दहावीचा पेपर

मंगळवारी सकाळी दहावीचा पेपर आणि सोमवारी रात्री ज्ञानेश्वरीच्या आईने जगाचा निरोप घेतला. याही परिस्थितीला मोठ्या धैर्याने तोंड देत आईचे अंत्यदर्शन घेऊन ज्ञानेश्‍वरीने आईला दिलेले वचन पूर्ण करण्यासाठी दहावीचा पहिला पेपर दिला आहे.

पुणे -दहावीच्या पहिल्या पेपरच्या दिवशीच आईचा मृत्यू झाला. मात्र, अधिकारी बनण्याचे वचन दिल्यामुळे तिने आईचे अंत्यदर्शन घेऊन पेपर दिला. ज्ञानेश्वरी दादाभाऊ गवंडी असे या विद्यार्थीनीचे नाव असून सविता दादाभाऊ गवंडी (वय 33) असे ज्ञानेश्वरीच्या आईचे नाव आहे. 'आई मी खूप अभ्यास करीन आणि मोठी अधिकारी बनून तुझं स्वप्न नक्की पूर्ण करीन, नको ना सोडून जाऊ आम्हाला' अशी आर्त हाक ज्ञानेश्वरीने तिच्या आईला मारली, तेव्हा अंत्यविधीसाठी उपस्थित जन समुदायालाही अश्रूंचा बांध फुटला. ही हृदय हेलावून टाकणारी घटना धामणी येथील गवंडीमळा येथे घडली आहे.

ज्ञानेश्वरीची आई सविता या गेल्या 2 वर्षापासून आजाराशी झुंजत होत्या, ज्यामुळे लहान वयातच घरकामाची जबाबदारी ज्ञानेश्वरीवर येऊन पडली. सोमवारी रात्री ज्ञानेश्वरी आईजवळ बसून दहावीच्या पेपरचा अभ्यास करत होती. दरम्यान, रात्रीच्या वेळी आईचे अचानकपणे निधन झाल्याने तिला जबर धक्का बसला. मात्र, मंगळवारी सकाळी ज्ञानेश्वरीने आईचे अंत्यदर्शन घेतले आणि अंत्यविधीनंतर ती थेट परीक्षा केंद्रावर दहावीचा पेपर देण्यासाठी गेली. तिच्या डोळ्यांतील अश्रू थांबता थांबत नव्हते. यावेळी ज्ञानेश्‍वरीचे वडील, नातेवाईक, ग्रामस्थ, शिक्षकांनी तिला आधार देण्याचा प्रयत्न केला.

हेही वाचा -पुण्यात मार्केटयार्डमध्ये शेतकऱ्याला मारहाणसह लूटमार, घटना सीसीटीव्हीमध्ये कैद

गवंडी कुटुंबाची परिस्थिती अत्यंत हलाखीची असून वडील दादाभाऊ यांनी शेती व्यवसायातून दोघांचे शिक्षण केले आहे. गेल्या दोन वर्षांपासून सविता ह्या आजारी होत्या. त्यांच्यावर अनेक ठिकाणी उपचार करण्यात आले. अखेर त्यांच्या निधनामुळे कुटुंबाची वाताहात झाली असून परिसरात शोककळा पसरली आहे. दादाभाऊ गवंडी यांना तुषार व ज्ञानेश्वरी अशी दोन मुले असून तुषारने नुकतीच बारावीचे पेपर दिले आहेत.

हेही वाचा -पुण्यातील शिवाजीराव भोसले सहकारी बँक घोटाळ्याची व्याप्ती वाढली