पुणे Mister Gay India 2023 : कोल्हापूर येथील विशाल पिंजानी यंदाचा 'मिस्टर गे इंडिया २०२३' ठरलाय. दक्षिण आफ्रिकेतील केपटाऊनमध्ये 27 ऑक्टोबरला होणार्‍या 'मिस्टर गे वर्ल्ड 2023' स्पर्धेत भारताचं प्रतिनिधित्व तो करणार आहे. मिस्ट एलजीबीटीक्यू फाऊंडेशन आणि क्वीरटेनमेंट प्रायव्हेट लिमिटेड यांच्यातर्फे काल खराडी येथील हॉटेल रँडिसन ब्ल्यू इथं या 'मिस्टर गे इंडिया २०२३' स्पर्धेचं आयोजन केलं होतं. केरळच्या अभिषेक विजयननं या स्पर्धेचं उपविजेतेपद पटकावलंय.
२० स्पर्धक सहभागी :या स्पर्धेत विविध राज्यातून २० स्पर्धक सहभागी झाले होते. विविध फेर्‍यांमध्ये यशस्वी होत विशाल व अभिषेक अंतिम फेरीत दाखल झाले होते. दोघांनीही उत्तम सादरीकरण करत, आपली सामाजिक जाणीव व समज दाखवत, एकमेकांना तगडी चुरस दिली. मात्र या अटीतटीच्या सामन्यात विशालनं हा खिताब जिंकला. यासह विशालला 'मिस्टर गे महाराष्ट्र' व अभिषेक याला 'मिस्टर गे केरळा' हा खिताब देऊन सन्मानित करण्यात आलंय.
"ही स्पर्धा केवळ ब्युटी पॅजेंट नाही, तर एलजीबीटीक्यू समुदायाला सक्षम करण्यासाठी, सन्मानानं जगण्याची संधी देणारं व्यासपीठ आहे. हे पॅजेंट सकारात्मक बदल घडवून जगण्यातील अडथळे दूर करून या तुच्छतेनं पाहिल्या जाणार्‍या समुदायाला मुख्य प्रवाहात सामील करून घेण्यासाठी उपयुक्त ठरते. देशाच्या विविध भागातून आलेल्या स्पर्धकांनी आपली पार्श्वभूमी, अनुभव, आजवरचा प्रवास, प्रेरणा, अनेकांकडून मिळालेली मौल्यवान साथ, समुदायाला सन्मान देण्यासाठी जागृती करण्याचा विचार मांडत परीक्षक व उपस्थितांची मने जिंकलीत." - श्याम कोन्नूर