पुणे -राज्यात यंदा सरासरीच्या ९५ टक्के पावसाची शक्यता आहे, असे भाकित कृषी हवामान तज्ज्ञ रामचंद्र साबळे यांनी वर्तवले आहे. कमाल तापमान, सकाळ व दुपारची सापेक्ष आर्द्रता, वाऱ्याचा वेग आणि सूर्यप्रकाशाचा कालावधी या निकषांवर हे अंदाज वर्तवण्यात आला आहे, असे रामचंद्र साबळे म्हणाले.
त्याप्रमाणेच यावर्षी मान्सून कालावधीत सरासरीपेक्षा कमी पाऊस होईल. वाऱ्याचा वेग कमी आढळल्यामुळे जून, जुलै आणि ऑगस्ट महिन्यात पुणे, राहुरी, कोल्हापूर, सोलापूर, धुळे, निफाड, जळगाव, अकोला, सिंदेवाही आणि परभणी येथे पावसात मोठा खंड पडेल. तर दापोली, पाडेगाव आणि नागपूर भागात दडी मारण्याची शक्यता राहील. कमी दिवसात अधिक पाऊस आणि काही काळ पावसात मोठे खंड असे हवामान राहील, असेही साबळे म्हणाले.
दरम्यान, पाऊस लांबल्यामुळे ६५ मिलिमीटर जमीन भिजल्याशिवाय पेरणी करू नये, असे आवाहनही त्यांनी राज्यातील शेतकऱ्यांना केले आहे.
