पुणे - शास्त्रीय संगीत हे केवळ विशिष्ट गटासाठीच असते, हा समज आपल्या अनेक चित्रपटांच्या संगीताला मिळणाऱ्या लोकप्रियतेने मोडून काढला आहे. याचे कारण चित्रपट गीतांमधून वेगळ्या पद्धतीने त्याचे झालेले सादरीकरण. आपल्याला तरुण पिढीत शास्त्रीय संगीत रुजवायचे असेल तर, त्यात सातत्याने प्रयोग होत संगीताचे नव्या पद्धतीने सादरीकरण करणे ही आजच्या काळाची आवश्यकता आहे. याच नवनवीन प्रयोगातून शास्त्रीय संगीत अधिकाधिक समृद्ध होईल, असे मत शास्त्रीय गायक महेश काळे यांनी व्यक्त केले.
'इनफ्युजन' या नवसंकल्पनेतील कार्यक्रमाबाबत बोलताना गायक महेश काळे गायक महेश काळे शास्त्रीय संगीत नव्या पिढीपर्यंत पोहोचविण्यासाठी विविध स्तरावर प्रयत्नशील असतात. त्याचाच एक भाग म्हणून 'इनफ्युजन' ही एक नवीन संकल्पना ते श्रोत्यांपुढे आणत आहेत. यानिमित्त पुण्यात झालेल्या पत्रकार परिषदेत तो बोलत होता. या संकल्पनेचे सादरीकरण सर्व प्रथम एनसीपीए (NCPA), मुंबई व त्यानंतर गणेश कला क्रीडा मंच, स्वारगेट, पुणे येथे येत्या १ व २ फेब्रुवारी रोजी होणार आहे. यावेळी बोलताना महेश म्हणाला, 'मला विविध प्रकारचे संगीत आवडते, पण मी शास्त्रीय संगीताची कास कधी सोडणार नाही, कारण माझा पिंड शास्त्रीय संगीताचा आहे. ‘कट्यार काळजात घुसली’ या चित्रपटानंतर श्रोत्यांची एक वेगळीच लाट समोर आली. ज्यात ज्येष्ठांपेक्षा तरुण रसिकांची संख्या जास्त होती, हे मला टिकवायचे आहे. या तरुणांनी शास्त्रीय संगीतात अधिकाधिक रस घ्यावा म्हणून काय करता येईल हा विचार सुरू झाला आणि मी काही प्रयोग करू लागलो.'
हेही वाचा - पुण्यात कैदी चालवत आहेत केश कर्तनालय; येरवडा कारागृहाचा उपक्रम
'चित्रपटातील शास्त्रीय रागांवर आधारित प्रसिध्द गीते घेऊन त्यांची सरगम, सोपी मांडणी आणि सौंदर्य आकर्षकरीत्या मांडण्याचा प्रयत्न यामधून सुरू झाला. त्यासाठी मोठा वाद्यवृंद संगतीला आला. हा प्रयोग लोकांना फार आवडत आहे, हे लक्षात आल्यावर त्यावर अधिक विचार करून ही ‘इनफ्युजन’ संकल्पना घेऊन आता लोकांपर्यंत पोहचत आहे. जुन्या पिढीतील जाणकारांची अपेक्षापूर्ती करत असतानाच नव्या दमाच्या तरुण पिढीचे शास्त्रीय संगीताप्रती असलेले कुतूहल टिकविणे हेही महत्वाचे आहे. हा कार्यक्रम नेमके याच दोन्ही गोष्टी साध्य करण्याचा एक प्रयत्न आहे.' असे सांगत 'या कार्यक्रमाचा गाभा हा शास्त्रीय संगीताचाच असणार आहे. यासाठी वाजणारा वाद्यवृंद हा हिंदुस्तानी व पाश्चात्य वाद्यांचा असेल. मात्र, असे असले तरी त्यांचा पाया हा हिंदुस्तानी शास्त्रीय संगीताचाच असणार आहे. म्हणजेच नवा साज लेवून आकर्षक पद्धतीने शास्त्रीय संगीत तरुणांना भावेल अशा स्वरुपात ते मी रसिकांसमोर मांडणार आहे, असे काळे म्हणाले. 'मनोरंजनाचे बोट धरत अभिजात भारतीय शास्त्रीय संगीताच्या गावाला जाण्याचा हा ध्यास आहे. पूर्वीचे श्रोते टिकवायचे कसे, नवीन तयार झालेले श्रोते अधिक आत कसे शिरतील आणि जे श्रोते नाहीत ते श्रोते कसे होतील, याच उद्देशाने ही संकल्पना मी घेऊन येत आहे, असेही महेश यांनी यावेळी सांगितले.
हेही वाचा - रामायणाशी संबंधित प्रसंग पाहा कापडी बाहुल्यांचे रूपात; पुण्यात प्रदर्शनाचे आयोजन
