पुणे : कोरेगाव-भीमा येथील विजयस्तंभावर 1 जानेवारीला साजरा होणाऱ्या शौर्यदिनानिमित्त प्रशासनाने जय्यत तयारी केली आहे. गाड्यांचे पार्किंग, सुरक्षेच्या दृष्टीने सीसीटीव्ही, ड्रोन कॅमेरे, बस सेवा, सभा ठिकाण, आरोग्यच्या सुविधा, आग्निशम दल, पिण्याचे पाणी, लाईट अशा सर्व सुविधांना आवश्यक असणारी तयारी पूर्ण झाल्याची माहिती जिल्हाधिकारी नवलकिशोर राम यांनी पत्रकार परिषदेत दिली.
दिवसेंदिवस भाविकांची वाढती संख्या लक्षात घेता या ठिकाणी येणाऱ्या भाविकांना कोणत्याही अडचणींचा सामना करावा लागू नये, यासाठी जय्यत तयारी करण्यात आल्याची माहिती प्रशासनाने दिली आहे. यावर्षी भाविकांची वाढती संख्या लक्षात घेऊन 16 ठिकाणी पार्किंगची व्यवस्था करण्यात आली आहे. तसेच या ठिकाणाहून विजयस्तंभ व वढू येथे जाण्यासाठी मोफत बससेवा उपलब्ध करून देण्यात आली आहे, असे जिल्हाधिकाऱ्यांनी सांगितले.
अनुचित प्रकार टाळण्यासाठी सीसीटीव्ही व ड्रोन कॅमेऱ्यांच्या माध्यमातून नजर ठेवली जाणार असून या परिसरात प्रतिबंधात्मक कारवाई करण्यात येणार आहे, अशी माहिती पोलीस अधीक्षक संदीप पाटील यांनी दिली आहे.