कोरोनाच्या काळात जीव धोक्यात घालणारे कोरोना योद्धे झाले बेरोजगार!

महानगर पालिकेने कोरोनाच्या विरोधात लढण्यासाठी 17 कोविड सेंटर उभारले होते. तिथे आरोग्य कर्मचारी कंत्राट पद्धतीवर काम करत होते. लॉकडाऊनच्या काळात सर्व नागरिक घरात बसले असताना हे सर्व आरोग्य कर्मचारी जीव धोक्यात घालून दिवसरात्र मेहनत करून आणि कोरोना रुग्णांची सेवा करत आपलं कर्तव्य पार पाडत होते. मात्र त्यानंतर बऱ्याच कर्मचाऱ्यांना कामावरून कमी करण्यात आले आहे.

पुणे- पिंपरी-चिंचवड शहरामध्ये गेल्या वर्षी मार्च महिन्यात कोरोना महामारीने शिरकाव केला होता. तेव्हा प्रशासनाला परिस्थिती हाताळताना अनेक अडचणींना सामोरे जावे लागले. त्यात, कोरोनाचा प्रादुर्भाव वाढत असल्याने शेकडो आरोग्य कर्मचाऱ्यांना पिंपरी-चिंचवड महानगरपालिकेच्या रुग्णालयात आणि कोविड सेंटरमध्ये नोकरी मिळाली. त्यावेळी सर्वाना कंत्राट पद्धतीवर नोकरीवर रुजू करण्यात आल होते. पगारही चांगला देण्यात आला होता. मात्र आता त्याच कोरोनाच्या विरोधात लढणाऱ्या योद्ध्यांना आता उपोषणाला बसावे लागले आहे. कोरोनाचा प्रादुर्भाव कमी होत असल्याचं पाहून त्यांना नोकरीवरून कमी करण्यात आल्याने त्यांच्यावर बेरोजगारीची कुऱ्हाड कोसळली आहे.

17 कोविड सेंटरमधून मिळाली होती नोकरीची संधी-पिंपरी-चिंचवड महानगर पालिकेने कोरोनाच्या विरोधात लढण्यासाठी 17 कोविड सेंटर उभारले होते. तिथे आरोग्य कर्मचारी कंत्राट पद्धतीवर काम करत होते. लॉकडाऊनच्या काळात सर्व नागरिक घरात बसले असताना हे सर्व आरोग्य कर्मचारी जीव धोक्यात घालून दिवसरात्र मेहनत करून आणि कोरोना रुग्णांची सेवा करत आपलं कर्तव्य पार पाडत होते. कोरोनाचा प्रादुर्भाव कमी झाल्याने नोकरीवरून केले कमी-गेल्या वर्षी नोव्हेंबर डिसेंबरनंतर कोरोनाचा प्रादुर्भाव कमी होऊ लागला होता. अनेक रुग्ण घरी परतले होते. कोरोना केअर सेंटर मधील खाटा रिकाम्या राहू लागल्या. त्यानंतर ही परिस्थिती पाहून प्रशासनाने 540 पेक्षा अधिक कर्मचाऱ्यांना कामावरून कमी केले. दरम्यान, महाराष्ट्रात काही दिवसांपासून पुन्हा कोरोनाने डोकं वर काढले आहे. त्यामुळे अशा परिस्थितीत या आरोग्य कर्मचाऱ्यांची गरज भासणार आहे, हे नाकारता येत नाही. मात्र, पालिका प्रशासन आपल्या भूमिकेवर ठाम असल्याचं पाहायला मिळत आहे. प्रादुर्भाव वाढत असल्याने नोकरीच्या आशा पल्लवित- तर, दुसरीकडे महाराष्ट्रातील सध्याची स्थिती पाहता महानगर पालिका आयुक्त राजेश पाटील यांनी कोविड सेंटर टप्प्या टप्प्याने सुरू करणार असल्याचे सांगत उपोषणाला बसलेल्या कोविड योद्ध्यांना दिलासा दिला आहे. प्रत्येक्षात मात्र किती जणांना कामावर घेणार हा प्रश्न अनुत्तरीतच आहे. दरम्यान, उपोषणकर्ते कोविड योद्धे मात्र नोकरीसाठी संघर्ष करताना दिसून येत आहेत.