पुणे : 'हरे रामा, हरे कृष्णा, जय जगन्नाथ, जय बलराम, जय सुभद्रा' असा अखंड जयघोष, वरुणराजाची संततधार आणि भाविकांचा मोठा उत्साह, अशा भक्तीमय वातावरणात पुण्यात जगन्नाथ रथयात्रेचा सोहळा जल्लोषात साजरा झाला. ओडिसामधील जगन्नाथ पुरी येथील रथयात्रेच्या पार्श्वभूमीवर, आंतरराष्ट्रीय कृष्णभावनामृत संघ इस्कॉन, पुणे यांच्यातर्फे या रथयात्रेचे आयोजन करण्यात आले होते. या रथयात्रेत हजारो भाविक पारंपरिक वेशात सहभागी झाले होते.
5 ते 6 हजार भाविकांची उपस्थिती : टिळक रस्त्यावरील सर परशुरामभाऊ महाविद्यालयातून या रथयात्रा सोहळ्याला प्रारंभ झाला. यावेळी पालकमंत्री चंद्रकांत पाटील, आमदार रवींद्र धंगेकर, राजेश पांडे, श्रीनाथ भिमाले, इस्कॉनचे वरिष्ठ संन्यासी प. पू. लोकनाथ स्वामी महाराज, प. पू. प्रबोधानंद सरस्वती स्वामी महाराज, प. पू. श्रीकृष्ण चैतन्य स्वामी महाराज तसेच सुमारे 5 ते 6 हजार भाविकांची उपस्थिती होती.
इस्कॉनच्या संस्थापकांनी केली सुरुवात : ओडिशातील जगन्नाथ पुरी येथे शतकानुशतके ही रथयात्रा काढली जाते. हा सोहळा साजरा करण्यासाठी जगन्नाथ पुरी येथे लाखो भाविक जमतात. भगवान जगन्नाथाची ही यात्रा भारतभर पोहचवण्यासाठी इस्कॉनचे संस्थापक आचार्य श्री भक्तीवेदांत स्वामी प्रभुपाद यांनी येथे तिची सुरूवात केली. रथयात्रेच्या दिवशी कात्रज मधील इस्कॉन मंदिरातील भगवान जगन्नाथ, बलराम आणि सुभद्रा यांच्या मूर्तींना खास दर्शनासाठी रथावर आणले जाते.