पुणे - शिरुर तालुक्यात दारुबंदी व्हावी यासाठी महिलांसह नागरिकांनी गावागावात जाऊन मोठा संघर्ष केला. मात्र, शिरुर तालुक्यात आज अवैध दारूचे धंदे सुरुच आहेत. त्यामुळे शिरुर पोलिसांनी या अवैध दारू धंद्या विरोधात कारवाईचा धडाका लावला आहे. आण्णापूर व डोंगरगण या ठिकाणच्या दारूभट्टीवर पुणे पोलिसांनी कारवाई केली.
शिरूर पोलिसांनी शिरूरचे पोलीस निरीक्षक प्रविण खानापुरे यांच्या मार्गदर्शनाखाली अवैध गावठी दारूच्या हात भट्टीवर कारवाई करण्याचा धडाका सुरू केला असल्याचे चित्र सध्या तालुक्यात पाहावयास मिळत आहे. डोंगरगण येथे 2600 लिटर दारुचे कच्चे रसायन नष्ट करण्यात आले. यातच पुन्हा आण्णापूर येथे अवैध दारुच्या भट्ट्यावर छापा टाकत सुमारे 1600 लिटर दारूचे रसायन जागेवर नष्ट करून दारूसाठी लागणारे तेथील उपलब्ध साहित्यही नष्ट करण्यात आले आहे. दरम्यान पुढील काळात शिरुर तालुक्यात अवैध धंदे व दारूभट्ट्या सुरू असल्यास कडक कारवाईचे धोरण राबवणार असल्याचे पोलीस निरीक्षक प्रविण खानापुरे यांनी सांगितले.
