पुणे : पिंपरी-चिंचवड शहरात पावसाने जोरदार हजेरी लावली. त्यामुळे शहराच्या सखल भागातील घरांमध्ये पाणी शिरले आहे. तर पावसामुळे शहरात चार ठिकाणी झाडे कोसळण्याच्या घटना घडल्या आहेत. सुदैवाने यात कोणतीही जीवितहानी झाली नाही.
गेल्या २४ तासात पिंपरी-चिंचवड शहरात मुसळधार पाऊस सुरू आहे. पावसामुळे शहरातून जाणारी पवना नदी दुथडी भरून वाहत आहे. तर, केजुबाई धरण देखील ओसंडून वाहत आहे. शुक्रवारी सकाळपासूनच पावसाने जोर धरला होता. त्यानंतर सायंकाळीपासून पावसाने जोरदार बॅटिंग केली. मध्यरात्री मुसळधार पाऊस झाल्याने नदी, नाले, ओढे ओसांडून वाहू लागले. त्याचबरोबर मुसळधार पावसामुळे शहरातील नागरिकांचे जनजीवन विस्कळीत झाले. या दरम्यान, काही भागातील विद्युत पुरवठा सुद्धा काही तासांसाठी खंडित झाला होता. त्यामुळे नागरिकांना नाहक त्रास सहन करावा लागला.
पावसामुळे शहरातील निगडी, प्राधिकरण, सांगवी आणि रहाटणी येथे झाडे कोसळण्याची घटना देखील घडली होती. सुदैवाने यात कोणतीही जीवितहानी झाली नाही. पावसामुळे पवना नदी दुथडी भरली असून नदी पात्रात मोठ्या प्रमाणात पाणी वाहत आहे. हे सर्व पाहण्यासाठी नदी काठी नागरिकांची मोठी गर्दी जमली आहे. त्याचबरोबर काही नागरिक, तरुण येथे सेल्फी सुद्धा काढताना दिसत आहेत. हे सर्व पाहता प्रशासनाकडून नदी काठच्या नागरिकांना सतर्कतेचा इशारा देण्यात आला आहे.