पुणे - परिवहन कार्यालयातील एजंटांच्या मदतीने भावानेच भावाची फसवणूक केल्याचा धक्कादायक प्रकार समोर आला आहे. भावाला व्यवसाय करता यावा, यासाठी दुसऱ्या भावाने त्याला टेम्पो खरेदी करुन दिला. मात्र, त्या भावाने टेम्पोच्या मूळ मालकाच्या सहमतीशिवाय तो टेम्पो विकला.
हेही वाचा -मुंबईत गुंतवणूकदारांना कोट्यवधीचा चुना लावणारा रिक्षाचालक गजाआड
सचिन गव्हाणे (रा. राजगुरुनगर) यांनी टेम्पो विकत घेऊन भावाला चालवण्यासाठी दिला. मात्र, अचानक भावाने टेम्पो विकला आणि पळून गेला. हे प्रकरण लक्षात येताच सचिनने टेम्पोच्या विक्रीची चौकशी केली आणि माहितीच्या अधिकारात सर्व व्यवहाराची माहिती मागवली. त्यात भावाने परिवहन कार्यालयात अधिकारी आणि दलालांच्या मदतीने ट्रकची विक्री केल्याचे समोर आले. सचिनने यानंतर पोलिसांत तक्रार दाखल करण्याचा प्रयत्न केला. मात्र, परिवहन कार्यालय आणि पोलीस यांच्यापैकी कोणीही याची दखल घेतली नाही, असा आरोप त्याने केला आहे.
हेही वाचा - ऑनलाईन खरेदी करताना सावधान..!
एकीकडे देशात परिवहन विभागाने चांगले व पारदर्शक काम करावे यासाठी केंद्रीय मंत्री नितीन गडकरी यांनी कंबर कसली आहे, तर दुसरीकडे याच परिवहन कार्यालयात एजंटांच्या मदतीने सर्वसामान्य नागरिकांची फसवणूक होत आहे. त्यामुळे अशा प्रकरणाकडे गडकरी कसे पाहणार हाही एक प्रश्नच आहे. दरम्यान, याबाबत उपप्रादेशिक अधिकारी आनंद पाटील यांना विचारले असता त्यांनी चौकशी सुरू असल्याचे म्हटले आहे. आता ही चौकशी किती दिवस चालणार असा प्रश्न सचिनने विचारला आहे.