पुणे जिल्ह्याला अवकाळी पावसाचा तडाखा.. बाजरी पिकाच्या नुकसानीने शेतकरी संकटात

खेड आंबेगाव जुन्नर शिरुर तालुक्यात उन्हाळी बाजरीचे पीक मोठ्या प्रमाणात घेतले जाते. या बाजरी पिकातून कुटुंबाला वर्षभर पुरेल ऐवढे धान्य उत्पादित होऊन जनावरांना मुबलक चारा मिळत असतो. त्यामुळे ग्रामीण भागातील शेतकरी बाजरीची लागवड करतात. मात्र, सध्या बाजरी काही ठिकाणी काढणीला आहे, तर काही ठिकाणी दाणे भरत आहेत, अशात अवकाळी पावसाची सुरुवात झाल्याने बाजरीचे मोठ्या प्रमाणात नुकसान होत आहे

पुणे- सध्या जनता आणि प्रशासनासह शेतकरी वर्ग कोरोनाचा सामना करत आहे. त्यातच आता खेड तालुक्यातील शेतकऱ्यांवर अवकाळी पावसाचे मोठे संकट उभे राहिले आहे. या पावसामुळे सध्य स्थितीत काढणीला आलेली बाजरी भुईसपाट झाली आहे. त्यामुळे शेतकऱ्यांचे मोठ्या प्रमाणात नुकसान झाले आहे. या नुकसानीची शासकीय पातळीवरुन वेळेत पहाणी करुन नुकसान भरपाई द्यावी, अशी मागणी हतबल झालेल्या शेतकरी वर्गातून केली जात आहे.

गत वर्षी दुष्काळी संकटातून सावरत शेतकऱ्यांनी खरीप हंगामात शेती पिकवली होती. मात्र नंतर सुरू झालेल्या अवकाळी पावसाने खरीप पीक पाण्याखाली गेले. त्यातूनही मागास पेरणी करून पिकवलेल्या रब्बी हंगामाचे उत्पन्नासह इतर नगदी पिकांचे उत्पादन शेतकऱ्यांनी घेतले मात्र, कोरोना सारख्या महामारीमुळे जनजीवन विस्कळीत झाले आणि बाजार न मिळाल्याने मोठ्या भांडवली खर्चातुन उभारलेला शेतमाल शेतात सडून गेला. तर खेड तालुक्यात सध्या काही शेतकऱ्यांनी पिकवलेली बाजरीही आता सुरू झालेल्या अवकाळीने जमीनदोस्त झाली आहे. खेड आंबेगाव जुन्नर शिरुर तालुक्यात उन्हाळी बाजरीचे पीक मोठ्या प्रमाणात घेतले जाते या बाजरी पिकातून कुटुंबाला वर्षभर पुरेल ऐवढे धान्य उत्पादित होऊन जनावरांना मुबलक चारा मिळत असतो. त्यामुळे ग्रामीण भागातील शेतकरी बाजरीची लागवड करतात. मात्र, सध्या बाजरी काही ठिकाणी काढणीला आहे, तर काही ठिकाणी दाणे भरत आहेत, अशात आवकाळी पावसाची सुरुवात झाल्याने बाजरीचे मोठ्या प्रमाणात नुकसान होत आहे मागील पाच दिवसांपासून वादळी वाऱ्यासह पावसाने खेड,आंबेगाव, शिरुर, जुन्नर परिसरात बाजरी पीक भुईसपाट झाल्याचे चित्र पहायला मिळत आहे. या नुकसानीचे पंचनामा वेळेत व्हावेत, यासाठी शेतकरी मागणी करत आहे. मात्र, शासकीय यंत्रणा कोरोनाच्या नियोजनात लागली आहे. त्यामुळे शेतकऱ्यांच्या नुकसानीकडे दुर्लक्ष होताना दिसत आहे. परिणामी शेतकरी आता दुहेरी संकटात सापडला आहे.