आगीत अडकलेल्या कुटुंबाची अग्निशमन दलाने केली सुखरूप सुटका

आगीत अडकलेल्या एका कुटुंबाला सुखरूप बाहेर काढण्यास अग्निशमन दलाला यश मिळाल आहे.

बारामती (पुणे) -तांदूळवाडी रोडवरील एका दोन मजली इमारतीला आग लागली होती. या इमारतीच्या दुसर्‍या मजल्यावर एक कुटुंब अडकले होते. या कुटुंबाला सुखरूप बाहेर काढण्यास अग्निशमन दलाला यश मिळाल आहे. ही घटना आज पहाटे 4:30 वाजण्याच्या सुमारास घडली.

जॉगिंगला जात असताना इमारतीला आग लागल्याचे काही नागरिकांच्या निदर्शनास आले. नागरिकांनी त्वरित अग्निशमन दलाला या घटनेची माहिती दिली. त्यानुसार बारामती नगर परिषदचे अग्निशमन दल काही वेळात घटनास्थळी दाखल झाले. अग्निशमन दलाच्या जवानांनी तत्काळ आग विझवून दुसऱ्या मजल्यावर अडकलेल्या लोकांना सुखरुप बाहेर काढले. या आगीत कोणत्याही प्रकारची जीवित हानी झाली नाही. मात्र, इमारतीचे मोठ्या प्रमाणात नुकसान झाले आहे. या आगीचे कारण अद्याप समजू शकले नाही.