पुणे :पुण्यातील कात्रज परिसरातील पुणे-बंगळुरू महामार्गालगत असणाऱ्या सर्विस रस्त्यावर आज पहाटे तीन वाजण्याच्या सुमारास एक विचित्र अपघात झाला. या अपघातात सात ते आठ वाहने एकमेकांवर धडकली. यात चार ते पाच जण जखमी झाले असून, त्यांच्यावर रुग्णालयात उपचार सुरू असल्याची माहिती समोर आली आहे.
कात्रजजवळ आठ वाहने एकमेकांवर आदळून विचित्र अपघात; पाच जखमी
असा झाला अपघात..
अग्निशमन दलाच्या जवानांनी दिलेल्या माहितीनुसार, पुणे-बंगळूर महामार्गावरील जांभुळवाडी रस्त्यावर आज पहाटे तीन वाजण्याच्या सुमारास एका कंटेनरने एका वाहनाला धडक दिली. यामध्ये चालक आणि क्लीनर अडकून पडले होते. त्यांची सुटका करण्याचे काम सुरू असतानाच, रस्ता मोकळा होण्याची वाट पाहत पाठीमागे आणखी काही वाहने रांगेत उभी होती. या वाहनांना पाठीमागून आलेल्या आणखी एका कंटेनरने धडक दिली. त्यामुळे पुढील सर्व वाहने एकमेकांवर धडकून हा विचित्र अपघात झाला.