पुणे -रेल्वे स्थानकावर संशयास्पदरित्या फिरणाऱ्या एका व्यक्तीच्या ताब्यातून साडेसात किलो अंमली पदार्थ (चरस) जप्त करण्यात आले आहे. या अंमली पदार्थाची किंमत 22 लाख 74 हजार रुपये इतकी आहे. चमनलाल हरिराम सोनी (वय 34) असे अटक करण्यात आलेल्या आरोपीचे नाव आहे.
लोहमार्ग पोलीस ठाण्याचे वरिष्ठ पोलीस निरीक्षक सुरेशसिंह गौड यांनी दिलेल्या माहितीनुसार, लोहमार्ग पोलीस स्टेशनचे कर्मचारी संतोष लाखे, माधव केंद्रे, संजय सोनवणे हे 26 ऑक्टोबर रोजी रेल्वे स्थानकावर गस्त घालत असताना त्यांना आरोपी चमनलाल सोनी हा संशयास्पद अवस्थेत फिरताना दिसला. पोलिसांनी त्याला ताब्यात घेऊन त्याची झडती घेतली असता एका पाकीटात 7 किलो 600 ग्राम चरस आढळले.